Mehwish-Hayat aur Fahad Mustafa apni anay wali film Zombied ki promotion ke liye Karachi mein Atif Aslam ke concert mein achanak entry mardi. Dono ne siyah rang ke casual libas pehne hue thay, jabke unki team zombies ke roop mein stage par mojood thi. Yeh jori 8 saal ke taweel arsay baad Eid-ul-Azha par aik sath baray parday par wapsi kar rahi hai.

Mashhoor TikToker Jannat Mirza ne apni mangni ki afwahon par khamoshi tod di hai. Fans ke sawal par unhon ne wazahat ki ke jab bhi unki zindagi mein mangni ya nikah jaisa koi bara faisla hoga, wo khud sab ko bataingi. Unka kehna hai ke aisi khabrein wo hamesha official taur par khud share karna pasand karengi.

Dananeer Mobeen ne London mein mini skirt pehanne par hone wali tanqeed ko “fuzool” qarar dete hue mustarad kar diya hai. Unhon ne kaha ke is tanqeed ka un par koi asar nahi hua kyunke unka libas poora tha aur tanqeed karne walon ka nuqta-e-nazar ghalat hai. Dananeer ke mutabiq, logon ko tanqeed karne se pehle haqaiq ko samajhna chahiye.

Rajab Butt ko aik cricket match ke doran apni jaan bacha kar bhagna parha jab fans ki bari tadad ne security tod kar maidan mein dhawa bol diya. Is hangama ke doran security aur diger khilariyon ne unhein hifazat dene ki koshish ki, lekin internet par is security breach aur fans ke rawayye ki sakht mazammat ki ja rahi hai.

Nabiha Ali Khan ne betiyon ke walidain ko mashwara diya. Unhon ne kaha ke beti ki paidaish ke sath hi walidain ko uske liye paise jama kar ke aik alag ghar khareedna chahiye taake uske paas hamesha apna aik thikana mojood ho. Unke mutabiq, shadi ke baad larki ka apna koi ghar nahi hota.

Youtuber Rajab Butt ne bataya ke unhein apni zindagi mein kabhi kisi larki se mohabbat nahi hui. Unke mutabiq mohabbat ka junoon aksar university life mein hota hai, par unhone kabhi university ka rukh nahi kiya kyunke unhon ne 17 saal ki umar mein hi kaam karna shuru kar diya tha.

Umair Jaswal ne maa ki mohabbat aur qurbanion par baat karte hue paigham share kiya hai. Unka kehna hai ke hum apni zindagi mein chahe jitna bhi kama lein, hum apni maa ke piyaar, duaoon aur unke sadqay ka karz kabhi nahi utaar sakte. Umair ke is jazbati bayaan ne social media par fans ke dilon ko chhoo liya hai.

Atiqa Odho ne drama serial Kafeel ke aakhri episode par comment karte hue kirdaar “Subuk” ka comparison apne bete Bilal se kiya hai. Unhon ne inkishaaf kiya ke jab unki divorce hui to unke bete Bilal ne hi unhein teesri shadi karne ke liye honsla diya, jabki unki maa is faisle ke khilaaf thin.

Adakaara Ushna Shah ne social media par apni pregnancy ka elan kar ke fans ko hairan kar diya hai. Unhon ne apne shohar Hamza Amin ke sath aik khubsoorat photoshoot share kiya, jis mein dono ne safaid rang ke kapray pehne hue hain. Ushna ne tasaveer ke sath likha ke is garmiyon mein unke ghar khushkhabri aane wali hai.

Kinza Hashmi aur Ali Raza ne inkishaaf kiya hai ke dosti se pehle woh aik doosre ke dushman the. Aik shoot ke doran galat-fehmiyon ki wajah se dono ke darmiyan larai shuru hui. Baad mein airport par mulaqaat ke doran baatein saaf huin aur ab dono behtareen dost ban chuke hain.