Hajra Yamin ne Umrah ada karne ka ruhani tajurba share kiye. Unhon ne bataya ke apnay paison se akele Umrah par jana un ke liye aik pur-sukoon tajurba tha. Hajra ka kehna tha ke is line of work mein hotay hue Allah ke ghar ka bulawa aana un ke liye yaqeen se bahar tha.

Mahira Khan ne aik interview mein Malayalam cinema (Mollywood) mein kaam karne ki khwahish ka izhaar kiya hai. Unhon ne bataya ke un ke khayal mein is waqt South Asia mein sab se behtareen films Malayalam industry mein ban rahi hain. Mahira is se pehle 2023 mein bhi aik Malayalam project sign karne ki afwahon ki wajah se charcha mein rahi thin.

Junaid Khan aur Momina Iqbal aik baar phir Geo TV ke naye romantic drama serial mein aik sath nazar ayenge. Is drame mein Momina ‘Paras’ naam ki ameer larki jabke Junaid un ke security guard ‘Zawar’ ka kirdar nibha rahe hain. Teaser dekh kar fans excited hain, magar kahani ko Salman Khan ki film ‘Bodyguard’ se inspired bta rahe hain.

Naimal Khawar Abbasi aur un ki behen Fiza Khawar ke darmiyan Instagram par kapde churane ko lekar aik mazahiya guftagu hui. Fiza ne Naimal ke surkh kurti wale hulyay par comment karte hue likha ke un ki nazar is kurti par hai. Is bhenon wale pyar ko social media par fans behad pasand kar rahe hain.

Momina Iqbal aur Hamza Habib ki shadi ke mustaqbil ke hawale se astrologer Ahmed Farooqui ne peshgoi ki hai. unhon ne dawa kiya ke sitaron ki kharab position ke baais yeh shadi mushkil se chalay gi. Is bayan par Momina ke fans kafi udaas hain aur un ka kehna hai ke ghaib ka ilm sirf Allah ke paas hai.

Asim Azhar ko un ke naye cover song ‘Tu Hai Wohi Dil Ne Jisse Apna Kaha’ par shadeed tanqeed ka samna hai. Dr. Ejaz Waris ka kehna hai ke unhon ne is behtareen Bollywood classic gaane ko kharab kar diya hai. Is bayan par un ke fans aur music lovers mukhtalif rad-e-amal de rahe hain.

Sanam Saeed ne apne looks par aane wale negative comments par baat ki hai. Unhon ne bataya ke khush-qismati se unhein career mein bohot kam trolling ka samna karna para. Kuch log unhein ‘Koji’ kehte hain, jis par Sanam ne behtareen jawab diya ke aane wale aise comments darasal Khaliq (Allah) par hain kyun ke unhein Allah ne banaya hai.

Hina Tariq ne dramon mein hamesha dupatta pehnne ki wajah btai hai. Unhon ne bataya ke yeh un ki zati pasand hai taake un ke mustaqbil ke shohar aur bache dekh sakein ke unhon ne hamesha izzat aur haya ke sath kaam kiya. Social media par fans un ke is faisle ki behad tareef kar rahe hain.

Dr. Madiha Khan ne social media par apnay waalid ki tarf se di gayi aik naseehat share ki hai. Un ke waalid ne unhein samjhaya tha ke hospital mein logon se hamesha naram-mizaji aur hamdardi se baat kiya karein, kyun ke wahan aane wale log pehle hi bohot takleef, pareshani aur mushkil halat ka samna kar rahe hote hain.

Emaan Khan ne apnay career ki mushkilat par baat karte hue bataya ke unhon ne 10 saal ki umar se kaam shuru kiya. Emaan ne jazbati hotay hue bataya ke shuruat mein senior adakarayein un ki walida ki insult karti thi aur unhein garmi mein makeup room se bahar bitha diya jata tha.