Senior adakara Seemi Raheel aur Hina Bayat ne Pakistan mein Halloween manane par tanqeed ki hai. Unhon ne ise ‘pagan’ aur ‘satanisim’ se jorhte hue kaha ke logon ko bhoot ban kar party karne ki zaroorat nahi hai, jis par social media par aam awam do groups mein taqseem ho gayi hai.

Adakar Omer Shahzad aur unki wife Shanzay Lodhi ke haan pehle bete ki paidaish hui hai, jis ka naam unhon ne Ismail rakha hai. Omer ne apne bete ke kaan mein azan dete hue aik khoobsurat video social media par share ki, jise fans aur showbiz shakhsiyat behad pasand kar rahe hain.

Adakara Hina Afridi ne mashhoor drama ‘Mitti De Baway’ ke set se khoobsurat BTS tasaveer share ki hain. Drama mein ‘Qamar un Nissa’ ka kirdar nibhane wali Hina ne apne co-star Wahaj Ali aur director Syed Wajahat Hussain ke sath khushgawar lamhat ki tasaveer post kein, jise fans behad pasand kar rahe hain.

Pakistan ke famous comedian Tabish Hashmi Geo Entertainment ke naye crime thriller drama ‘Case No. 10’ mein Saba Qamar ke sath adakari karte nazar aayeinge. Shahzeb Khanzada ki likhi hui is kahani mein Saba Qamar lead role mein hain, jabke drame ki kahani aik haqeeqi crime event par mabni batayi ja rahi hai.

Junaid Khan ne Atiqa Odho ke podcast mein apne career aur shadi shuda zindagi par baat ki. Junaid ne bataya ke adakaron ki biwiyon ke paas bara dil hota hai kyunke onscreen roles ko bardasht karna asaan nahi. Jabke Atiqa Odho ne kaha ke adakaron ke shohar aam taur par apni biwiyon ke kaam se khush rehte hain.

Adakara Fatima Effendi ne apne aik note mein inkishaf kiya hai ke pichle 6 mahino se wo severe postpartum depression ki wajah se isolation mein thi. Unhon ne bataya ke unhe pehle aise Khuda se milwaya gaya jo saza dene wala tha, lekin Allah ki reham-dili aur shohar ke saharay ne unhein is mushkil waqt se nikal liya.

Pakistani singer Momina Mustehsan ne Halloween ke mauqe par Statue of Liberty aur Scooby-Doo ke kirdar Velma se mutasir hokar unique aur dilchasp looks se fans ko hairan kar diya hai. Unke teal gown, crown aur skeleton ke sath poses ko social media par behad pasand kiya ja raha hai.

Adakara Merub Ali ne Dananeer Mobeen aur Romaisa Khan ki salahiyat ki tareef karte hue khushi ka izhar kiya hai ke social media unhein spotlight mein laya. Unhon ne naye talent ko moqay dene mein social media ke positive kirdar ko saraha aur dono ki adakari ko behad pasand kiya.

Pakistan ki famous Adakara Hina Afridi ne apni roohani zindagi aur ibadat ki routine par baat karte hue bataya ke wo din mein 8 se 9 namazien parhti thi. Unhon ne bataya ke farz namazon ke sath Ishraq, Chasht, Awwabin aur Tahajjud ka ehtimam unki zindagi ka aik ahem hissa raha hai.

Adakara Sahar Hashmi ne aik gehra aur philosophic paigham share kiya hai ke “Jinhon ne mor ko saanp khatay dekha ho, woh khoobsurti par yaqeen nahi rakhtay”. Unka yeh paigham zindagi ki talkhiyon aur zahiri khoobsurti ke peechay chhupi haqeeqat ko bayan karta hai, jise fans ki janib se behad pasand kiya ja raha hai.