Momina Iqbal aur Muhammad Hamza Habib ke Mehndi shoot ki aik video social media par aane ke baad logon ki tanqeed ka nishana ban gayi hai. Is video mein dono ke darmiyaan kaafi romance dikhaya gaya hai, jis par fans sakht naraz hain. Kai logon ne is par tanz karte hue kaha ke aisi niji videos public mein share nahi karni chahiye.

Alizeh Shah ne Dananeer Mobeen par ‘self-obsessed’ hone ka ilzaam lagate hue unke manager Umer Mukhtar par sakht tanqeed ki hai. Haal hi mein Alizeh ki aik video par mazaq urane ki afwahein ureen, jis par unhon ne kaha unki video se Dananeer ka koi taalluq nahi tha. Unhon ne Dananeer ki film ‘Mera Lyari’ ke flop hone par bhi tanz kiya.

Meera ne bayan diya hai ke Gen Z adakar purane aur veteran sitaron ka muqabla nahi kar sakte. Unhon ne kaha ke naye adakaron mein un jaisa aur Shaan Shahid jaisa tajurba aur miyaar nahi hai. Meera ne naye sitaron ko mashwara diya ke woh pehle apne kaam ko behtar karein aur ‘Psycho’ jaisi filmon ke miyaar ka kaam paish karein.

Khalil-ur-Rehman Qamar ne awam se guzarish ki hai ke woh khawateen ke baare mein baat karte hue ghalat zabaan ka istemal na karein. Unhon ne is baat par zor diya ke har aurat ko aik hi tarazu mein nahi tolna chahiye aur hamesha izzat ka rasta ikhtiyar karna chahiye.

Fizza Ali ne social media par apne shohar ke sath aik dilchasp video share ki hai, jis mein woh unhein bicycle par bitha kar ride de rahi hain. Unhon ne is khubsoorat lamhay ko share karte hue apne shoher ko apna “favourite ride partner” qarar diya, jis par fans bohot dilchasp reactions de rahe hain.

Fahad Mustafa ne BBC Urdu ko diye gaye aik interview mein khawateen mein apni maqbooliyat par baat ki hai. Unhon ne kaha ke 14 saal se game show ‘Jeeto Pakistan’ host karne ki wajah se unhein aisi maqbooliyat mili hai ke ab Pakistan ki har maa un jaisa beta, har behen un jaisa bhai aur har biwi un jaisa shohar chahti hai.

7th Sky Entertainment aur Geo Entertainment mil kar Pakistan ki maroof alleged drug queen Anmol aka “Pinky” ki zindagi par aik high-profile biographical drama bana rahe hain. Is drama mein markazi kirdar ke liye adakara Saba Qamar ko cast kiya gaya hai. Dilchasp baat yeh hai ke is complex kahani ke script mashhoor journalist aur host Shahzaib Khanzada likh rahe hain.

Durefishan Saleem ne saal 2026 mein apne waldein ke sath Hajj kia. Apne is roohani safar par baat karte hue unhon ne Allah ka shukr ada kiya aur bataya ke Hajj unhein duniya se dunya-dari chorhne aur roohaniyat se jorhne ka ahem sabaq deta hai. Unhon ne is safar mein milne wale behtareen logon ko bhi yaad kiya.

Momina Iqbal ne haal hi mein apne Instagram bio ko badal kar “Proud Wife” likha hai, jis ne foran hi unke madaahon ki tawajjoh haasil kar li. Is tabdeeli ke baad social media par khushi ki lehr dorh gayi hai aur log unhein shadi ki mubarakbaad aur nek tamannaon ke paighamaat bhej rahe hain.

Ali Raza samet Muneeb Butt, Jannat Mirza ne Eid-ul-Adha par Qurbani ke gosht aur zibah hue janwaron ke sath tasaveer share kein. Is par actor Khaqan Shahnawaz ne sakht tanz karte hue kaha ke zibah hue janwaron ki photos lagana jahalat ki nishani hai. Unhon ne kaha ke Qurbani Allah ke liye hoti hai, social media par posing ke liye nahi.