Senior adakara Fazila Qazi ne bataya hai ke unke bachon ki quwat-e-mudafiat (immunity) mitti mein khelne se mazboot hui. Fazila ke mutabiq unke shohar Qaisar Khan Nizamani bachon ko bahar mitti mein khelne aur girne dete thay taake wo mard-e-maidan banein. Unhon ne bataya ke unke bete Ahmed ne to khelte hue dant bhi tor liye thay.

Saba Faisal ne Hira Khan ko unki tanqeed par karara jawab dete hue “reality check” de diya hai. Saba ne kaha ke Hira acting se zyada dancing ke liye mashhoor hain aur unhen pehle apna naam banana chahiye. Unhon ne mazeed kaha ke Hira abhi bohat choti hain aur unki baaton ki gehrai samajhne ke qabil nahi.

Joyland’ ke director Saim Sadiq ne Humayun Saeed ke “bari behnon” walay bayan par shadeed tanqeed ki. Saim ne kaha ke Humayun, Atiqa Odho se sirf 4 saal chote hain, phir wo bacha kyun ban rahe hain? Unhon ne sawal uthaya ke agar 22 saal choti heroine Sajal Aly unke sath kaam kar sakti hai, to kya usey Humayun ko “Nana Jan” kehna chahiye?

Yasir Hussain ne apni wife Iqra Aziz ke sath dobara kaam karne se inkaar kar diya. Vasay Chaudhry ke show mein unhon ne wazeh kiya ke “Biwi ke sath acting nahi ho sakti.” Yasir ne aakhri baar ‘Ek Thi Laila’ mein sirf channel ke israar par Iqra ke sath kaam kiya tha, magar ab wo mazeed sath kaam nahi karenge.

Faysal Quraishi ne Talat Hussain ki “dementia” ki bemari aur unki aakhri yaadon par baat ki. Faysal ne bataya ke jab Talat Sahab ne phone par unhen pehchanne se inkaar kiya aur unka kaam pucha Unhon ne rotay hue inkishaf kiya ke apne ustad ko is haal mein dekh kar wo khud ko sambhaal na sakay.

Zahid Ahmed ne “dating” na karne ki asal wajah bata di. Unhon ne kaha ke wo shuru se hi mustaqil rishta chahte thay aur unhon ne 27 saal ki umar mein seedha shadi ka faisla kiya. Zahid ke mutabiq zyada relationships se larki ki izzat kam hojati hai, is liye unhon ne aik parhi likhi aur professional khatoon se shadi ko tarjih di.

Adakara Hira Khan ne Saba Qamar ki birthday party par tanqeed karne walay Dr. Ejaz Waris ki class le li. Hira ne kaha ke Actors “public property” nahi hotay aur unki personal life unka apna mamla hai. Unhon ne mazeed kaha ke kisi ke libas ya party karne par unhen nishana banana band kiya jaye aur ikhtilaf hamesha tameez se hona chahiye.

Adakara Noor Zafar Khan ne petrol ki barhti qeematon par anokhay andaz mein tanz kiya hai. Noor ne Ghode ke sath apni tasveer share karte hue caption likha ke “Petrol mehenga hai,” jis se unhon ne mehangai se pareshan awam ko highlight kia. Noor ka ye mazahiya andaz social media par tezi se viral ho raha hai.

Superstar Humayun Saeed ne Atiqa Odho aur Nadia Khan ko apni “bari behnon” jaisa qarar de diya hai. Humayun ka kehna hai ke jab wo bachay thay to Atiqa Odho pehle se star thin. Unhon ne dono adakaraon ke liye makhsoos ehtiram ka izhaar karte hue kaha ke ye sab unke liye behnon ki tarhan hain.

Omer Shahzad aur unki wife ne Umrah video par honay wali tanqeed ko mustarad kar diya hai. Masjid-al-Haram ke clips viral honay par sarifeen ne “PDA” par gussay ka izhaar kiya, jis par jori ne jawab diya ke “Hum miyan-biwi hain aur kuch ghalat nahi kiya.” Unhon ne logon ko doosron par tanqeed ke bajaye apni fikr karne ka mashwara diya.