Shees Sajjad Gul ne apne hi blockbuster drama “Mere Paas Tum Ho” ko overrated qarar de diya hai. Shees ka kehna hai ke ye ek aam sa drama tha jisay zaroorat se zyada hype mili. Unhon ne mazeed kaha ke unhon ne koi khas acting nahi ki thi, sirf lines parh kar boli thin aur wo khud bhi ek overrated adakar hain.

Host Javeria Saud par social media users ne bari tanqeed ki. Logon ka kehna hai ke wo apne Ramzan show mein gareeb logon ki takleef aur aansuon ko sirf apni ratings aur TRP barhane ke liye istemal kar rahi hain. Social media par un ke is rawaiye ko ghair-sanjeeda kaha ja raha hai aur show par pabandi ka mutalba ho raha hai.

YouTuber Rajab Butt aur unki ahliya Emaan Fatima ke darmiyan talaq ki khabron ne shiddat ikhtiyar kar li hai. Rajab Butt ne Emaan ko divorce notice bhaij diya hai, jis par Emaan ne shadeed gham o gussay ka izhaar kiya. Is silsilay mein Dr. Nabiha Ali Khan ne apna public message jari karte hue dono ko ghar bachane ka mashwara diya hai.

Imad Wasim aur unki doosri wife Nyla Rajah aaj kal sakht tanqeed ki zad mein hain. Controversial shadi aur ex-wife par legal case ke baad, ab Nyla ki laser treatment wali video viral ho gayi hai. No-makeup look dekh kar internet users unki “real skin” ko troll kar rahay hain aur Imad ki ex-wife Sannia se unka muqabla kar rahay hain.

Javeria Saud ne Ramzan transmission par milne wali trolling par khul kar baat ki. Unka kehna tha ke wo apni videos ke comments nahi parhti, lekin log unhein negative comments ke screenshots bhej dete hain. Javeria ke mutabiq trolling se unhein farq nahi parta, balkay wo ise positive leti hain aur kehti hain ke is se unke gunah kam ho jate hain.

Pakistani actress Nadia Jamil ne khulasa kiya ke unhein Bollywood ki blockbuster film Veer Zaara mein kaam ke offer mili thi lekin unhon ne mana kar diya. Nadia ke mutabiq us waqt unka beta sirf teen mahine ka tha aur unhon ne apne bachay ko career par tarjeeh di. Logon ne ise career suicide kaha, lekin unke liye motherhood zyada ahem tha.

Nida Yasir ne clarify kiya ke Faryal Gohar aur Jamal Shah ko interview par unhon ne dono ki raza mandi se invite kiya tha. Nida ke mutabiq Jamal Shah ka kehna ke unhein Faryal Gohar ke baare mein pata nahi tha. Jo galat samjha gaya. Interview ka maqsad tha ke log apne ex ke saath izzat karein, na ke badnaam karein.

Saud Qasmi Ramzan transmission mein charity segment dekh kar jazbati hogaye aur camera par aa kar ro pade. Unhon ne ek mehmaan ki madad ke liye Bioniks ke CEO Anas Niaz se raabta karne ka wada bhi kiya. Is doran Saud apne bade bhai ko yaad kar ke bhi emotional ho gaye jin ki diabetes ki wajah se taang kaatni pari thi.

Namra Shahid ne Nadia Khan ke show mein apni maa ke inteqal par jazbati ho kar rodiya. Unhone bataya ke unki maa unke liye hamesha support ka zariya rahi, unke taleem aur showbiz career mein unka saath diya. Namra ne kaha ke maa ki wafat unke liye bohot bara loss thi aur wo ab bhi us dard ko process kar rahi hain.

Abdul Rehman ne N*tional College of Arts (N*CA) Lahore ki alleged bullying culture ko expose kiya. Unhon ne video mein bataya ke dream university mein admission ke kuch hafton baad hi unhein ragging aur bullying ka samna karna para jis ki wajah se unhon ne N*CA chhorne ka faisla kiya.