Pakistani model Zainab Yousaf ne khawateen ko mali faide ke liye “Sugar Daddies” istemal karne ka mashwara de kar social media par toofan khara kar diya. Unhon ne kaha ke aurton ko jazbaati talluq ke bajaye sirf paison par focus karna chahiye. Is bayan ko awaam ki janib se intehai ghair-zimmedarana qarar de kar kadi tanqeed ka nishana banaya ja raha hai.

Rajab Butt ko Eid par Salman Khan ki nakal karne par shadeed troll kiya jaraha hai. Balcony se fans ko hath hila kar milne wali video viral hote hi logon ne unhein “Temu version of Salman Khan” ka laqab dediya. Viewers ka kehna hai ke Rajab sasti shohrat ke liye Bollywood superstar ka style copy kar rahe hain.

Sara Loren ne Shaan Shahid ke rawayye par shikayat kardi. Unhon ne kaha ke Shaan aik baray star hain magar set par aksar unke nakhray aur mizaaj ki wajah se log unse baat karte hue dartay hain. Sara ke mutabiq Shaan ko set par thora mazahiya aur khush-ikhlaq hona chahiye taake baaki log kaam ke doran khauf-zada mehsoos na karein.

Mashhoor adakara Mariyam Nafees ne apne shohar Amaan Ahmed ke saath shadi ki saalgirah manayi. Mariyam ne social media par apni purani yaadon ka aik khubsoorat recap share kiya. Unhon ne apne shohar ke liye aik mohabbat bhara paigam likha aur bataya ke wo apni is khush-haal zindagi ke liye bohat shukarguzar hain.

Gen Z ki maroof adakara Aina Asif ne bade stars ke rawayye se parda utha diya. Imran Ashraf ke show mein unhon ne inkishaaf kiya ke senior adakaar aksar set par nakhray dikhate hain aur limelight cheenne ki koshish karte hain. Aina ke mutabiq unhein sabotaging ka samna bhi karna para, magar unhon ne in talkh tajurbaat se sabaq seekha hai.

Mashhoor host Nida Yasir ne bataya hai ke unhein wazan kam hone par tareef pasand nahi. Unka kehna hai ke jab koi unhein “slim” kehta hai, toh wo la-parwah ho kar zyada khana shuru kar deti hain. Nida ke mutabiq jab log unhein mota kehte hain, toh wo darr kar parhez aur exercise per zyada tawajjo karti hain.

Dr. Nabiha Ali Khan ne adakaara Fiza Ali ki teesri shadi ki bharpoor himayat ki hai. Fiza ne Eid par Ejaz se shadi ka elan kiya tha, jis par Nabiha ne unhein mubarakbad dete hue Nikkah ko aik muqaddas bandhan qarar diya. Yaad rahe ke Dr. Nabiha ke shohar Haris pehle Fiza par tanqeed kar chuke hain.

Maroof host aur adakaara Shaista Lodhi ki Eid ki tasaveer ne social media par nayi behas cherdi hai. Shaista ne apne teenon bachon ke saath khubsoorat pics share kien, magar unke doosray shohar ki adam-mojoodgi ne fans ko pareshan kar diya. Bohat se sarifeen unki doosri shadi ke khatmay aur talaq ke bare mein sawalaat pooch rahe hain.

Saba Hameed ne Ali Zafar aur Meesha Shafi ke 8 saal purane harassment case par khamoshi tor di. Adalat ke bahar unhon ne kaha ke woh haar nahi maanengi aur unse baat nahi kar sakti jo aurton ki izzat nahi karte. Meesha Canada mein hain jabke unki walida adalat mein muqabla kar rahi hain.

Hamza Ali Abbasi ki behan Dr. Fazeela Abbasi ki mushkilaat barh gaein. Islamabad ki Sessions Court ne “Money Laundering” case mein unki zamanat kharij kar di hai. FIR ke mutabiq unke 22 bank accounts se 25 Arab rupay Dubai aur America transfer kiye gaye. FIA is raqam ke asal zariye ki tehqiqaat kar rahi hai aur case dobara khul gaya hai.