Naimal Khawar ne nojawano ko kamyabi ka mashwara dete hue kaha hai ke humsafar talaash karne se pehle apni zaat par kaam karein. Unhon ne zor diya ke pehle apni parhai mukkamal karein, khud par mehnat karein aur kuch ban kar dikhayein, phir apna jeevan sathi chunein. Naimal ke mutabiq career banana shadi se pehle bohat zaroori hai.

Adakaara Reema Khan ne social media par larnay walay logon ko mashwara diya hai. Reema ka kehna hai ke har behas jeetna zaroori nahi hota aur khamoshi hi sab se bara jawab hai. Fans ka manna hai ke Reema ne ye naseehat Resham ko di hai jo aaj kal Deedar ke sath lafzi jung mein masroof hain.

Adakaara Laiba-Khan ne sachi mohabbat ke bare mein dil jeet lene wali baat share ki hai. Unka kehna hai ke mohabbat hamesha dil se hoti hai aur is mein zahiri khubsurti koi ahmiyat nahi rakhti. Laiba ke mutabiq asli rishtay shakal dekh kar nahi balkay jazbaat se bante hain. Unki is baat ko social media par bohat pasand kiya ja raha hai.

Dua Zehra ke waalid Mehdi Ali Kazmi ne “Kazmi Family” ke naam se apna vlogging channel shuru kar diya. Jahan kuch log unki himmat ki tareef kar rahe hain, wahi kuch social media users unhe beti ko dobara internet par lane par tanqeed ka nishana bana rahe hain. Fans is naye channel aur family ki updates par mili juli raye rakhte hain.

Deedar aur Resham ke darmiyan lafzi jung dobara shuru hogayi hai. Deedar ne Resham ko intehai negative aur logon ki zindagi tabah karne wali aurat qarar diya, jis par Resham ne palat kar jawab diya ke ye log sirf meri kamyabi aur “langar” se jalte hain. Deedar ne ab apne sandal ki tasveer share kar ke baat mazeed barha di hai.

Ali Zafar Se Case Harne Aur 50 Lakh Jurmana Hone Ke Baad Meesha Shafi Ne Khamoshi Tor Di Hai. Meesha Ka Kehna Hai Ke Unka Bolna Hi Unki Asli Jeet Hai. Unhon Ne Bataya Ke Wo Is Trauma Se Nikalne Ke Liye Ab Apne Kaam Par Focus Karein Gi Aur Himmat Nahi Haarein Gi.

Iffat Omar aik baar phir Meesha Shafi ki himayat mein khari hogayi hain. Iffat ne Ali Zafar ko khula challenge dete hue kaha ke “Mujh par case karo,” kyunke unke saath bhi waisa hi kuch ho chuka hai jaisa Meesha ne bataya. Unhon ne kaha ke wo court notice ka intezar kar rahi hain aur unhe jhoota sabit karna asaan nahi hoga

Saboor Aly aur Ali Ansari ne apni beti ki pehli salgirah bari dhoom dhaam se manayi. Is mauqe par Saboor aur unki beti ne aik jaisay polka dot dresses pehni thin jo sab ko bohat pasand aain. Is khushi mein Sajal Aly aur ghar walon ne bhi shirkat ki, aur social media par inki khubsurat tasaveer tezi se viral ho rahi hain.

“Pakistan-Idol” achanak band kar diya gaya hai jis se fans naraz hai. Intizamia ka kehna hai ke mulki halat aur petrol ki kami ki wajah se show mukkamal nahi kiya ja sakta, is liye ab koi finale nahi hoga. Doosri taraf awam is bahane ko manne ko tayyar nahi aur social media par makers ko “paisa khane” par troll kar rahi hai.

Muneeb Butt ne joint family mein rehne ke fayde batate hue kaha hai ke bare buzurgon ki mojoodgi ghar ke liye barkat hoti hai. Unka manna hai ke jab maa baap aur bare ghar mein hon, to chotay motay jhagray aur masail asani se hal ho jatay hain. Muneeb ke mutabiq buzurgon ka hona ghar mein sukoon ka sabab banta hai.