Bushra Ansari ki apne shohar Iqbal Hussain ke sath viral hone wali videos par netizens ne ghussay ka izhaar kiya hai. Logon ka kehna hai ke unhen apni umar ke hisab se sanjeedgi ikhtiyar karni chahiye. Kai viewers ne unke “teenage” andaz aur shooting style ko na-pasand karte hue unhen sakht tanqeed ka nishana banaya.
Rabia Noreen ne bataya ke Abid Ali ki wafat ke baad wo shadeed depression ka shikaar ho gayi thin. Unhon ne kaha ke us doran unhon ne logon se milna aur khana peena tak chor diya tha. Rabia ne zor diya ke depression se nikalne ke liye insan ko khud koshish karni parti hai, warna jismani sehat bhi gir jati hai.
Sonya Hussyn ne do saal ki koshish ke baad apne khandan ke sath Umrah ki saadat haasil kar li hai. Unhon ne Khana Kaaba ki ziyarat aur Ghilaf-e-Kaaba ka tohfa milne par apne jazbat ka izhaar kiya. Sonya ka kehna hai ke Allah ne is saal unke liye raste khol diye, jis par wo nihayat shukarguzar hain.
Talat Hussain ki beti Tazeen Hussain ne bataya hai ke pehle shohar ke inteqal ke baad unhen doosri shadi ka faisla karne mein 5 saal kyun lage. Unhon ne kaha ke tanhai ne unhen khud ko samajhne ka mauqa diya aur wo ab sukoon mein hai. Tazeen ne mazeed bataya ke unki mulaqaat unke maujooda husband se Instagram ke zariye hui thi.
Saheefa Jabbar ne Overseas Pakistanis ko “munafiq” qarar dete hue kaha hai ke log bahar ja kar rona band karein. Unka manna hai ke log Pakistan se bahar settle ho kar wahan ke laws follow karte hain aur zindagi maze mein guzarte hain, magar phir bhi purane gharon aur maids ko yaad kar ke hypocrisy dikhate hain.
