Social media sarifeen aur fans ne khwaish zahir ki hai ke adakara Saba Qamar ko ‘C**c**ine Queen’ Anmol Pinky ke kirdar par mabni kisi project mein cast kiya jaye. Fans ka manna hai ke Saba Qamar apni behtareen adakari se is pacheeda kirdar ke sath poora insaf karein gi aur yeh kirdar un par bohot suit karega.

Mizna Waqas ne aik podcast mein adakaron ki kharab hygiene ka parda fash kiya hai. Unhon ne bataya ke kuch stars apne baal aur makeup par to bohot zoor dete hain, magar unke moun se aisi badbu aati hai ke samne wala behosh ho jaye. Unhon ne kaha ke aisi styling ka kya faida jab aap aam ahtiyaat bhi na karein.

Maryam Nafees ne miya biwi ke rishte ke hawale se aik ahem mashwara share kiya hai. Unka kehna hai ke shohar aur biwi ko kabhi bhi aik doosre ki burai ya shikayat kisi teesre shakhs, chahe woh dost ho ya ghar walay, se nahi karni chahiye. Agar aap aisa karenge to samne wala aapke partner ki izzat karna chhor dega.

Mashhoor Pakistani influencer (Ken Doll) ne aik interview mein apni kamyabi ke peeche chhupe jazbati safar aur bachpan ki yaadon se parda uthaya hai. Unhon ne bataya ke bachpan ki tanhai mein khilaunon aur khayali doston ne unka sath diya, jabke unki walida ki musalsal himmat afzai ne unhein is maqam tak pohanchaya.

Meera ne daawa kiya hai ke unhein Yash Chopra ne film “Jab Tak Hai Jaan” mein Shah Rukh Khan ke sath Katrina Kaif wala lead role offer kiya tha. Apni film “Psycho” ki promotion ke doran unhon ne bataya ke unka India mein shandaar istaqbal hua tha. Social media sarifeen Meera ke is daaway ko jhoot qarar de rahe hein.

Adakara Momina Iqbal ne Instagram par inkshaf kiya hai ke unhein aik PML-N ke MPA ki taraf se shadeed harassment aur jaan se maarne ki dhamkiyan mil rahi hain. Unhon ne FIA aur Punjab Police par shikayat dabane ka ilzam lagaya aur Wazir-e-Ala Punjab Maryam Nawaz se insaf aur tahaffuz ki guzarish ki hai.

Fizza Ali aur Nabeel Qureshi ki aane wali film “Zombied” ki promotion ke liye Ramzan Chhipa ke sath aik video share ki gayi hai, jis mein woh logon ko zombies se bachne aur nasha na karne ki hidayat de rahe hain. Social media par fans is unexpected collaboration ko shadeed troll kar rahe hain aur ise be-tuka qarar de rahe hain.

Adakara Ramsha Khan ne apna Instagram account deactivate kar diya hai, jis ki wajah se fans kafi hairan hain. Doosri taraf, unke shohar Khushhal Khan ne apne Instagram ki profile picture par Ramsha ki tasveer laga di hai. Is tabdeeli ne social media par halchal macha di hai aur fans tarah tarah ke rad-e-amal de rahe hain.

Mashhoor Pakistani singer aur adakara Hadiqa Kiani ko BBC ne dunya ki “100 Most Inspiring Women” ki fehrist mein shamil kiya hai. Hadiqa Kiani ko unki shandaar mosiqi aur samaaji kaamon khususan khairati sargarmiyon ki wajah se is azeem azaaz se nawaza gaya hai, jis par poori qaum unhein mubarakbaad de rahi hai.

Farhan Saeed ne drama “Bas Tera Saath Ho” mein 40 saal ki umar mein college larke ka kirdar nibhanay par tanqeed ka jawab diya hai. Unhon ne kaha ke kirdar ki jazbati tarbiyat ke liye yeh zaroori tha. Farhan ka manna hai ke yeh tanqeed bilkul durust hai magar 5th episode tak aate aate log yeh bhool jate hain.