Bollywood ke famous film-maker Karan Johar ne Instagram par tamam Indian actors ko unfollow kar diya hai, lekin woh ab bhi kuch Pakistani sitaron ko follow kar rahe hain. Un ki following list mein Fawad Khan, Mahira Khan, Imran Abbas aur Ali Zafar jaise bade Pakistani naam shamil hain.

Wasim Akram, Misbah-ul-Haq aur Fakhr-e-Alam ne Hajj par hone wali tanqeed ka jawab diya hai. Netizens ne un ke Hajj ko “picnic” kaha aur sar mundwanay par sawal uthaye. Unhon ne wazahat ki ke ulema ke mutabiq baal katwana (Qasr) bhi jaiz hai, aur Hajj ke doran thora muskurana ya doston se baat karna ibadat ka hi hissa hai.

Superstar Mahira Khan ne aik bayan mein kaha hai ke woh apni umar ka yeh hissa bohot enjoy kar rahi hain. Unhon ne mazeed bataya ke ab aisa waqt aa raha hai jab unhein heroine ke roles milna band ho jayenge, is liye woh is daur ke har lamhay ko khushi se guzar rahi hain.

Nida Yasir ne bataya ke un ki walida ne un ki shadi ko bachaya. Unhon ne kaha ke shadi ke shuruati saalon mein woh gusse mein rokar apni walda ko shikayatein lagati thin. Magar un ki walda un ki baaton par dhyan nahi deti thin aur damad se naraz nahi hoti thin, jis se un ka rishta tootne se bach gaya.

Murtaza Wahab ne bayan diya ke mazi mein Karachi ko duniya ka khatarnak shehar kaha jata tha, magar aaj yahan na dehshatgardi hai, na target killing. Is par Talha Anjum ne likha ke Karachi mein ab na pani hai, na bijli, na gas hai aur na hi road hain, aur is sab ke liye unhon ne Sindh Government ka shukriya ada kiya.

Pakistan ki pehli zombie movie “Zombeid” ne box office par kamal kar diya hai. Is film ne Pakistan ki tareekh ki sab se badi opening ka record bana liya hai. Film ne pehle hi din 21.34 crore rupaye kamaye hain, jo ke ab tak ka sab se bada box office record hai.

Momina Iqbal ki Barat ki aik video social media par bohot viral ho rahi hai, jis mein unke shohar aur bhai camera ke saamne middle finger dikha rahe hai. Is isharay ko internet sarfeen ne intehai ghalat aur behuda qarar diya hai. Kai logon ne un ke is rawayye par sharmindagi ka izhaar kiya hai.

Shahzad Nawaz ne Ali Safina ke podcast mein bataya ke agar unke ikhtiyar mein ho to woh Pakistani currency notes se Quaid-e-Azam ki tasveer hata dein. Unhon ne kaha ke humein koi sharam nahi hai kyunke hum unhi notes par rishwat dete aur lete hain aur dhoka dahi karte hain jabkeh Quaid-e-Azam ki tasveer samne hoti hai.

Nida Yasir Europe mein chuttiyan guzar rahi hain. Unhon ne Budapest ke bazzaron mein bike chalate hue aik video share ki. Is video par internet sarfeen ke darmiyaan mixed-reactions samnne aaye, jahan kuch log un ki khushi ki tareef kar rahe hain to kuch log haal hi mein Hajj karne ke baad un ke is andaaz par tanqeed kar rahe hain.

Fazila Qazi ne Iqrar-ul-Hassan par sakht tanqeed karte hue unhein Imran Khan ke khilaef bura bhala kehne par nishana banaya hai. Unhon ne kaha ke Iqrar-ul-Hassan ko Imran Khan ki dushmani ka obsession ho chuka hai aur unhein professional ilaj ki zaroorat hai. Fazila ne mazeed kaha ke unhein afsos hai ke woh mazi mein Iqrar-ul-Hassan ke shows mein shareek hoi thi.