Senior adakara Atiqa Odho ne drama ‘Muamma’ ke anjam par shadeed mayoosi ka izhaar kiya hai. Unka kehna hai ke drame ka ikhtetaam bohat hi ajeeb aur over-dramatic tha. Atiqa ko hairat hai ke Saba (Jijji) is end par kaise razi huin, kyun ke is mein kirdar ko proper closure nahi diya gaya.
Pakistani Mashhoor adakara Nadia Hussain ne drama ‘Kafeel’ mein Aashir Wajahat ki shandaar adakari ki tareef ki hai. Unhon ne Aashir ke jazbati scene aur confident andaz se mutasir ho kar unhein ‘Pakistan ka SRK’ qarar diya hai, jo ke unke kaam ke liye ek bohat bara aizaz hai.
Hum TV ka naya drama ‘Zanjeerain’ pehli hi qist se viewers ke dil jeet raha hai. Sajal Aly aur Ameer Gilani ki chemistry aur purane Hum TV ki yaad dilane wale andaz ko fans bohat pasand kar rahe hain. Farhat Ishtiaq ki kahani aur Shahzad Kashmiri ki direction ne shuru se hi sab ko mutasir kar liya hai.
Mashhoor adakara Asma Abbas ne apne Indian fans aur doston ke liye muhabbat ka izhaar kiya hai. Unhon ne afsos zahir kiya ke siyasi talkhi ki wajah se dono mulkon ke log mil nahi sakte. Asma ne umeed zahir ki ke aik din log bina kisi pabandi ke aik dusre se mil sakenge.
Pakistani dramo mein kam kar ke shoharat pane wale Adakaar Nameer Khan ne inkishaf kiya hai ke wo adakari ke sath-sath aik software engineer bhi hain. Tabish Hashmi ke show mein unhon ne bataya ke unhon ne 1 saal Pakistan mein aur 3 saal Canada mein Quality Assurance ke tor par kaam kiya hai.
