Namrah Shahid ne aik interview mein producers Abdullah Kadwani aur Asad Qureshi ki khulay dil se tareef ki hai. Unhon ne bataya ke yeh dunya ke woh wahid do producers hain jinhon ne kabhi un ki payment delay nahi ki. Mazeed yeh ke un ki walida ke inteqal par taziyat ka paigham bhejne wale bhi sirf yahi do producers thay.
Nameer Khan ne apne khaufnak flight experience ko fans ke sath share kiya hai. Unhon ne bataya ke kharab mausam ki wajah se un ka jahaz char se panch ghante tak hawa mein phansa raha. Is afsoosnak halat mein unhein zindagi ki qader ka ehsaas hua aur unhon ne fans ko aapas mein muhabbat aur narmi se rehne ki hidayat ki.
Saira Naseem ne Nimra Mehra ke hawale se bayan diya hai. Saira Naseem ka kehna tha ke Nimra Mehra ka koi gaana viral hona aik alag baat hai, magar woh playback ya professional singer nahi hain. Unhon ne wazahat ki ke Nimra ne sangeet ki baqaida training haasil nahi ki hai, is liye woh unhein singer nahi maantin.
Nida Yasir ko apnay morning show mein khud ko ‘Millennial’ group (1981-1996) kehne par shadeed tanqeed ka samna hai. Show mein Nida aur un ki saathi Amber Khan khud ko millennial kehti rahein, jis par social media viewers ne narazi ka izhaar karte hue kaha ke dono ‘Gen X’ hain. Awam ne unhein show karne se pehle research karne ka mashwara diya.
Hania Aamir aur Indian rapper Badshah ke darmiyan dating ki afwahon ka end ho gaya hai. Punjabi adakara Isha Rikhi ne Badshah ke sath apni shadi ka baqaida elan kar diya hai, jis ke baad social media par fans is nayi jodi ko mubarakbaad de rahe hain aur purani afwahein dum tor gaein.
