President Asif Ali Zardari ne 11th NFC Commission mein tabdeeli approve kardi, Balochistan ne Mahfooz Ali Khan ko naya member nominate kiya. Sath hi Criminal Laws Amendment Bill 2025 bhi sign. Sources ke mutabiq IMF ke pressure par NFC Award formula revise hoga, provinces ka 57.5% share kam aur naya system poverty, tax aur revenue pe base hoga.

Actress Maya Ali ne podcast mein shaadi par khuli baat ki, keh diya ke wo sirf logon ke pressure ya age ki wajah se shaadi nahi karein gi. Unka kehna hai shaadi eik bara faisla hai jo genuine connection aur respect pe depend karta hai. Maya ne kaha, “Jab dil ready hoga aur waqt hoga, tab hi shaadi hogi.”

YouTuber Ducky Bhai ne apne 4 din ke physical remand ke khilaaf sessions court mein appeal file kardi. Court ne NCCIA se 1 September tak jawab talab kar liya. Pehle unka 5 din ka remand gambling app promotion case mein extend hua tha. Wife Aroob Jatoi ko 30 August tak interim bail mil gayi.

NCCIA ne YouTuber Iqra Kanwal, Mudassir Hassan, Hasnain Shah aur Anas Ali ko 2 September ko hazir hone ka hukum diya, ilzaam hai ke unhon ne online trading aur gambling apps promote ki. Pehle YouTuber Ducky Bhai isi case mein giraftar ho chuke hain, jahan unke paas se digital data aur illegal financial transactions ke saboot mile hain.

Lahore ATC ne Imran Khan ke nephews Shahrez Khan aur Shershah Khan ko May 9 riots aur Jinnah House attack cases mein judicial remand par jail bhej diya. Police ne dono ka physical remand mangte hua saboot recovery, photogrammetric tests aur social media probe ka hawala diya tha, magar court ne request reject karke unhein judicial custody order kar diya.

Wazirabad mein flood ki wajah se eik maa ko waqt par medical madad na milne par uske teen naye paida hone wale bacha (2 larkiyan, 1 larka) intiqal kar gaye. 28 August ko Nala Phalko ke paas delivery gari mein hui kyunke sarkein doobi hui thi. Punjab abhi bhi shadeed flooding ka shikar hai, PTA ne free voice minutes announce kiye.

Sialkot mein flood situation ke sabab 5 September tak schools band karne ka notification jari, Shekhupura, Sharaqpur, Muridke aur Safdarabad mein bhi taleemi sar-garmiyan moattal. DC Saba Asghar ke mutabiq 48 ghanton mein 512 mm record barish se 3 nala overflow kar gaye, urban areas jal thal. DC ne kaha flood affectees ki madad har haal mein ki ja rahi hai.

Sindh CM Murad Ali Shah ne flood ke khatre ke mad e nazar irrigation department ko ready rehne ki hidayat di. Guddu aur Sukkur Barrage par paani 8-11 lakh cusec tak pohanch sakta hai, 9 lakh se super flood ke chances. Pak Army stand by hai, logon se cooperate karne aur hoshiyar rehne ki appeal.

Islamabad High Court ne naya duty roster jari kar diya, Dr Aafia Siddiqui ka case Justice Ijaz Ishaq se transfer hokar Justice Inaam Ameen Minhas ko de diya gaya, pehli hearing 1 September hogi. Dr Fauzia Siddiqui ki petition par IHC pehle federal cabinet ko contempt notice de chuki, court ne report delay par sakht warning di.

Pattoki mein afsosnak waqia, Assistant Commissioner Furqan Muhammad Khan washroom mein dead halat mein mile. Police report ke mutabiq wo washroom mein gir kar sar pe chot lagne aur khoon behne ki wajah se jaan se gaye. DG PDMA Irfan Ali Kathia ne unke inteqal par gehra gham aur afsos ka izhar kiya.