OpenAI ne 18 saal se kam umar users ke liye nayi pabandiyan laga di. CEO Sam Altman ke mutabiq, safety privacy aur freedom se zyada ahmiyat rakhti hai. Ab ChatGPT na “flirty” baatein karega aur na hi suicide topics par khuli guftagu. Parents ke liye blackout hours ka option bhi introduce hoga.

Cervical cancer se bachao ke liye HPV vaccine kaafi effective hai. Pakistan mein 15 Sept se mulk bhar mein 8 se 14 saal ki bachiyon ko yeh vaccine lagayi ja rahi hai. Dr. Muhammad Khalid Shafi ne kaha ke social media ke afwahein ghalat hain, vaccine ka koi nuksan ya side effect nahi, sirf sooi chubhne ki halki takleef hoti hai.

Pakistan ne Indian planes ke liye airspace band mein 1 mah ka mazeed izafa kar dia. Ab yeh pabandi 23 October tak barqarar rahegi. 23 April se band airspace ki wajah se Indian airlines ko ab tak ₹35 billion se zyada ka nuqsan ho chuka hai. Yeh ban passenger aur military dono planes par laagu hai.  

Sukkur ke Sanghar area mein ba-asar wadera ka zulm, paani peene par oontni ke bache ki taang kaat di aur tractor se baandh kar ghasseeta. Malik Ghulam Mustafa ki report par police ne case darj karke eik mulzim Qurban Brohi ko giraftar kar liya, doosron ki talaash jari. CM Sindh ne notice le kar oontni ke ilaaj ka hukum de diya.

Karachi mein sirf 2 ghanton ke andar 3 afraad qatal. Nazimabad No.3 mein Zubair ko goli maar kar hamesha ke liye khamosh kar diya gaya, Sher Shah mein eik aur shakhs nishana bana. Korangi mein eik shehri ne daku par firing kar ke eik ko maar diya, doosra farar. Police ne teeno waqia ki tehqiqaat shuru kar di.

Karachi mein kapron ke tajir ko dhamki dene wale 3 bhatta khor dhoraji se giraftar karliye gaye. SSP Amjad Sheikh ke mutabiq, mulziman ne 3 crore rupay bhatta maanga tha aur tajir ke daftar lifafe mein 3 goliyan aur parchi bheji thi. Mobile, SIM aur asleha baramad, mulziman se abhi bhi tehqiqaat jari.

PTA Chairman Maj Gen (R) Hafeez-ur-Rehman ne Senate committee ko bataya ke Pakistani citizens ka sensitive data, CNIC copies, travel history aur SIM details dark web par sirf Rs500 mein bik raha hai. Hajj applicants ka data bhi compromised. NCCIA investigation shuru, leak purana hai ya naya, abhi analysis jari hai.

K-Electric ka Saddar mein bara crackdown haa jiske natije mein, 1,300 illegal connections khatam, 1,700 kg taar baramad. Company spokesperson ke mutabiq, 1.45 million units chori se bach gaye. Saddar ke 88% feeders load-shedding se free, magar Bizarat Lines, Hijrat Colony aur Sultanabad jaise areas abhi bhi masail ka shikar. Outstanding dues Rs 1.1 billion se zyada.

Baldia Town Karachi mein 22-wheeler trailer ne motorcycles kuchal di, 4 afraad zakhmi. Rescue teams ne injured ko hospital pohanchaya aur traffic police ne road clear karne ka kaam shuru kiya. Teen bikes ab bhi trailer ke neeche phansi rahin. Authorities ne tehqiqaat shuru kar di, traffic flow shadeed mutasir.

Zaid Ali ki walida Naheed Noor ne upcoming dating show Lazawal Ishq aur host Ayesha Omar par sakht tanqeed ki. Unka kehna hai ke show young generation mein vulgarity promote karega aur Ayesha Omar ko yeh project accept nahi karna chahiye tha. Social media users bhi Naheed Noor se agree karte nazar aaye: “Perfect words”, “We won’t let this program run.”