Ken Doll ne Huda Beauty ke sath apne perfume collaboration par baat ki. Unhon ne bataya ke unhein London mein barhay launch ke liye bulaya gaya tha jahan unki mulaqaat Huda Kattan se hui. Adnan ka kehna hai ke unki mazi ki controversies ne unhein international platform par pohanchaya, kyunke Huda ki team unki har controversy par barri nazar rakh rahi thi.

Farhan Saeed ne aik interview mein Pakistani drama aur film industry ki tareef karte hue kaha hai ke hamari industry Bollywood se behtar hai. Unhon ne bataya ke Pakistan mein khwateen ko shadi aur bache hone ke baad bhi bator-e-heroine qubool kiya jata hai, jabke parosi mulk mein shadi ke baad actresses ko retired samajh liya jata hai.

Khushhal Khan ki shadi ke baad unki wife Ramsha ne Instagram par apna naya account active kar liya hai. Ramsha ne apna username tabdeel karne ke sath bio mein “the calm behind Khushhal Khan’s storm” likha hai, jabke dono ne aik jaisi display picture bhi lagayi hai. Sarifeen is jaldi aur khubsoorat post-Nikkah update ko behad pasand kar rahe hain.

Mishi Khan ne Sitara-e-Imtiaz haasil karne wale fankaron ko hukoomat ki taraf se sirf 500 rupay ke cheque diye jaane par kadi tanqeed ki hai. Unhon ne ise fankaron ki toheen qaraar dete hue kaha ke iqtedar mein baithe log apne upar lakhon kharch karte hain magar fankaron ko itni mamooli raqam di jati hai.

Sabeena Farooq ne Eid-ul-Adha ki amad par janwaron ke sath narmi aur ehteram se pesh aane ka aik ahem paigham share kiya hai. Unhon ne zor diya ke qurbani ke jazbe mein reham-dili shamil honi chahiye aur khushi ke is mauqe par riwayaat ko poori dekh-bhaal aur janwaron ke haqooq ka khayal rakhte hue nibhana chahiye.

Momina ne Saqib ke ilzaam par jawab diya ke unke shohar unhi ki di hui gift car istemaal kar rahe hain. Momina ne Instagram par kaha ke is shakhs ko lagta hai poora mulk iske paison par chal raha, Pehle Fortuner aur ab doosri gaari ka jhoota dawa karne wale se log apni kidneys mehfooz rakhein warna yeh unhein bhi bech dega.

Fiza Ali ko London mein singer Kumar Sanu ke concert ke doran apne shohar Ejaz Khan ke sath over-the-top dance aur expressions par internet par kadi tanqeed ka samna hai. Sarifeen ne unke is andaz ko “attention-seeking” aur “chichora” qaraar dete hue kaha ke aisi niji videos ko is tarah social media par viral karna bilkul munasib nahi lagta.

Areej Chaudhary ne Saba Faisal ke mardoon ki cheating bardasht karne wale bayan par sakht tanqeed ki hai. Areej ne kaha ke kisi bhi tarah ki cheating qabil-e-qabool nahi hoti aur koi bhi self-respecting aurat ise bardasht nahi kare gi. Unhon ne mazeed kaha ke agar yahi baat mard ki jagah aurat ke liye kahi jati toh koi ise qubool na karta.

Feroze Khan ki ex-wife Aliza Sultan ne Instagram par gym se aik mystery man ke sath mirror selfie share ki hai. Aliza ne post par “ItsallaboutMe” likha aur sath hi aik quote share ki jis mein likha tha, “Jo mard aapke liye aurat banna aasan kar de, wahi sahi mard hai.” Is post ne unke fans mein dilchasp behas chher di hai.

Momina Iqbal ke shohar Hamza Habib ne lawyer ke sath press conference karte hue bataya ke Saqib Chaddar ne Nikah se pehle Momina ki character assassination ki koshish ki aur un par jhooti FIR katwayi. Hamza ne wazeh kiya ke Momina unki ‘red line’ hain aur unhein interview dene ke liye paison ki offer bhi hui.