Nabiha Ali Khan ke ek recent bayan ne social media par tehelka macha diya hai. Unka kehna hai ke mard chahte hain ke unki biwiyan hamesha pretty aur maintained rahen, jabke shadi ke baad auratein wazan barha leti hain aur “mardon ke paas dekhne ko kuch nahi rehta.” Is bayan par logon ne shadeed tanqeed aur mixed reactions ka izhar kiya.

Farhan Saeed ne kaha ke Pakistani content ko Netflix tak le jaana poori industry ka maqsad hona chahiye. Podcast mein unka kehna tha ke quality storytelling siyasat se upar hoti hai aur Indian audience ab bhi Pakistani dramas mein dilchaspi rakhti hai. Unhon ne zor diya ke global platforms par aana industry ko international reach aur badi growth de sakta hai.

Twinkle Khanna ne clarify kiya ke unka “Raat Gayi Baat Gayi” wala bayan sirf mazak tha. Bollywood ki former actress aur Akshay Kumar ki wife ko apne talk show Too Much with Kajol & Twinkle mein be-wafai par remarks dene par tanqeed ka samna tha. Unka kehna hai ke ye bayan kisi serious discussion ke liye nahi, bas halka-phulka mazak tha.

Sanam aur Emmad Irfani bohot jald drama Kafeel mein dobara screen share karne ja rahe hain. Big Bang Entertainment ki production, Umera Ahmed ki writing aur Meesam Naqvi ki direction ne fans ka excitement already barha diya hai. Fahad Mustafa ke release kiye gaye teaser ne cinematic vibe di hai. Drama ARY Digital par Monday–Tuesday slot mein “Biryani” ki jagah on-air hoga.

Ayesha ne claim kiya hai ke Nida Yasir ne unhein show par bula kar Neecha dikhaya aur aise sawaalat kiye jisse woh bohot uncomfortable mehsoos karne lagin. Ayesha ka kehna hai ke host ka tone aur attitude demeaning tha, jis ki wajah se unhein laga jaise unki beizzati ki ja rahi ho. Social media par is par garam behas jari hai.

Hania Amir ki ek video social media par viral ho gayi jismein woh desi Lahori lehje ki naqal kar rahi hain. Video mein unhon ne Urdu ka ‘ر’ ko ‘ڑ’ se badal kar purane Lahore ke lehje ko mimic kiya. Fans ne video ko funny aur entertaining qarar diya, jabke kuch ne unko “non-serious celebrity” keh kar criticize kiya.

Faysal Quraishi ki noticeably slim look ne fans ko tension mein daal diya hai. Log umeed kar rahe hain ke woh bilkul theek hon aur apna khayal rakh rahe hon. Social media par unke liye support aur well-wishes ka silsila jari hai, jahan fans unki sehat aur wellbeing ke liye duaen bhej rahe hain.

Kapil Sharma ne reveal kiya ke film Kis Kisko Pyaar Karoon 2 ke set par unki biwi Ginni mojood thi, jiske baad co-actress ke saath romantic scene karna unke liye mushkil ho gaya. Kapil ne kaha ke biwi ke saamne romance karte hue unke “haath tak kaanp jate hain.” Ginni ne bhi maana ke woh Kapil ko romantic scenes karte dekh nahi sakti.

Bollywood ki mashhoor actress Madhuri Dixit ne siyasat mein shamil hone ki afwahen khatam kar di hain. 58 saal ki Madhuri ka kehna hai ke unka siyasat ka irada kabhi nahi raha aur woh is field ke liye fit nahi hain. Unka focus ab apne naye project Mrs. Desh Pandey par hai, jisme woh complex aur deep role play karengi.

Shilpa Shetty ne senior Bollywood actor Dharmendra ki wafat par gehra dukh zahir kiya aur Instagram par unke saath tasveerain share karte hue kaha ke aap jaisa bada dil kisi ka nahi. Unhone likha ke Dharmendra ki asli khoobsurti unki simplicity aur meharbani thi. Film industry mein gham ki lehar daur gayi aur unki antim rasoomat Mumbai mein ada ki gayi.