Ranbir Kapoor ne apne lifestyle brand ARKS ke naam ka asal matlab reveal kar diya. Social media mein log speculate kar rahe the ke kya yeh Alia Bhatt aur beti Raha se inspired hai, lekin Ranbir ne clarify kiya ke brand ka naam sirf aesthetic aur lifestyle vision ke liye rakha gaya hai, aur iska personal connection nahi hai.

Senior actress Atiqa Odho ne kaha hai ke Pakistani fun ko India mein is liye allow nahi kiya jata kyunke hamare dramas aur films unke political narrative ko challenge karte hain. Unka kehna hai ke art aur politics ka takrao cultural exchange ko nuqsan pohancha raha hai. Atiqa ne barabari aur mutual respect par zor diya.

Bollywood actress Alia Bhatt ne kaha hai ke ab woh ek waqt mein 2 ya 3 films par kaam nahi karna chahtin. Unka kehna hai ke maa banne ke baad unki working pace change hui hai. Ab woh ek film par poori tawajjoh dena, production aur creative role mein bhi active rehna chahti hain.

Senior actor Noman Ijaz ne kaha hai ke showbiz industry mein log ek doosray ke liye kina aur bughz rakhte hain. Unka kehna hai ke project reject karna dushmani ban jata hai. Noman ne yeh bhi kaha ke social media ne fan curiosity kam aur exposure ka nasha zyada kar diya hai.

2025 Pakistani cinema ke liye historic saal raha. Local films ne record-breaking box office business kiya. Love Guru ne 8.2 arab rupay kama kar naya benchmark set kiya, Deemak pehli horror film bani jo 2.1 arab se upar gayi. Neelofar strong hit rahi, jabke Welcome To Punjab ne international awards se pehchan banayi. Eid releases expectations par na utar saki.

TikToker Nadeem Nani Wala ne interview mein YouTuber Ducky Bhai ki giraftari ka zimmedar Dr Affan Qaiser ko qarar de diya. Unka kehna hai ke Dr Affan ne NCCIA ko links aur maaloomat dein jinki bunyaad par action hua. Nadeem ne saboot hone ka dawa kiya, jabke social media par behas phir tez ho gayi.

Actress Sana Javed ne husband Shoaib Malik ke saath Dubai mein New Year celebrate karte hue tasaveer share kar dein. Burj Khalifa se fireworks ke manazir bhi Instagram par post kiye gaye. Sana ne fans ko naye saal ki mubarakbad di, jabke social media par tasaveer ko kaafi pasand kiya ja raha hai.

Hrithik Roshan ne girlfriend Saba Azad ke saath dancing pictures share kar ke 2026 ka welcome kiya. Actor ne post mein apne “double thumb” par mazaahiya comment bhi kiya aur fans ko New Year ki mubarakbaad di. Hrithik ne naya saal khaas taur par apne fans ke naam dedicate kiya.

Malaika Arora ne recent interview mein Arbaaz Khan se talaq par khamoshi tor di. Unhon ne kaha ke unhein apne faislon par koi pachtawa nahi. Talaq ke baad unhein shadeed tanqeed ka samna raha, magar apni khushi ko priority dena unke liye zaroori tha. Unhon ne society ke double standards par bhi baat ki.

Kareena Kapoor ne 2025 ko apne aur family ke liye mushkil saal qarar diya, Saif Ali Khan par huay hamlay ka hawala dete hue. Actress ne Instagram par note share kar ke un tamam logon ka shukriya ada kiya jo unke saath kharay rahe. Kareena ne kaha ke woh 2026 mein shukar aur positivity ke saath enter kar rahe hain.