Pakistan ki mashhor aur talented adakara Natasha Ali ne bhabhiyon ke liye aik ahem paigham share kiya hai jis mein unhon ne kaha ke bhabhiyon ko samajhna chahiye ke ghair-shadi-shuda ya talaq-yafta behnein apnay walidain ke ghar ke ilawa aur kahan jayengi, is liye unhein izzat aur jagah milni chahiye.
UK ki South Asian makeup artist Shireen ne aik podcast mein bataya ke senior adakara Bushra Ansari ko makeup ka behad shauq hai. Unhon ne bataya ke Bushra makeup mein sab se zyada waqt leti hain aur unhon ne face par gems lagwaye, jis ke baad woh bilkul Madhuri Dixit ki tarah lag rahi thin.
Abrar-ul-Haq ne apne mashhoor gaane ‘Nach Punjaban’ ka kissa aik baar phir cher diya hai. Unhon ne wazahat ki ke Bollywood film mein is gaane ke istemal ke liye unhon ne koi ijazat nahi di thi. Abrar-ul-Haq ka kehna hai ke yeh masla abhi tak hal nahi hua aur Karan Johar ke khilaaf legal proceedings (kanooni karwayi) abhi bhi active hain.
Pakistani Journalist aur lawyer Zorain Nizamani ne viral sensation hone wali Fariha Farrukh ki journalistic abilities ko expose kiya hai. Zorain ne bataya ke jab unhon ne Fariha ke behtareen articles ko AI tool par check kiya, toh pata chala ke woh 60 se 70% tak AI-generated thay. unhone fariha ki ability ko challenge kiya.
Lahore concert ke doran gulukaar Bilal Saeed ko adakara Sonya Hussyn ko uncomfortable karne par tanqeed ka samna hai. Bilal ne baat karte hue Sonya ko kandhon se pakra, jis par social media sarfeen ne narazi ka izhaar karte hue kaha ke un ka physical touch munasib nahi tha aur is se Sonya uncomfortable lag rahi thin.
