Karachi mein transporters ka protest Sindh hukumat se baat cheet ke baad khatam. Rashid Minhas Road hadse mein bhai-behen ki maut par awaam ne 7 dumpers jala diye. Hukumat ne muawza dene, burnt dumpers repair karne aur safety steps ka wada kiya. Dumper owners ko 15 din mein cameras, trackers lagane ka hukum.

Pakistan ne UNICEF se India ki taraf se polio, measles aur typhoid vaccines ki supply delay ka masla uthaya. 27 billion rupees ki 17 million doses mein 60% UNICEF aur 40% Pakistan ne fund kiya. Indian company July se delay kar rahi hai. UNICEF ne is issue ko jaldi hal karne ka wada kiya.

Pakistan Airports Authority ne Islamabad Airport ke 8 din band hone ki afwaahen rad kar di. 14 August se pehle sirf kuch dates par 2 ghante ke liye flights rukengi, baaki operations normal rahenge. Airport outsourcing mein Turkish company ka bid approve, do companies late submission par out, documents ki detail checking jari.

Balochistan mein security khatrat ke sabab Railways Minister Hanif Abbasi ne 10-15 August tak Jaffar Express aur Bolan Mail band kar di. Spezand, Quetta ke paas blast se Jaffar Express ke 5 coaches patri se utar gaye, 1 musafir zakhmi. March mein bhi BLA hamle ke baad ye service 16 din tak band rahi thi.

Saudi Arabia ke Taif mein eik aurat, Noura Salem Al-Shammari, ne apne shohar ki doosri biwi Taghreed Awadh Al-Saadi ko kidney failure se bachane ke liye apne jigar ka 80% donate kiya. Saalon ki dialysis ke baad medical tests se tissue match hua, surgery successful rahi. Is qadam ko be-misaal selflessness ka example kaha ja raha hai.

K-Electric ne naya consumer-friendly bill layout introduce kar diya jisme saari calculations aur info eik jagah di gayi hai. Tariff ya slab mein koi tabdeeli nahi. Bill mein tariffs/taxes updates, customer details aur service notices honge. Extra pages khatam kar ke paper usage kam, e-bill subscriptions 60% barh gayi. Naya design customer feedback par mabni hai.

Iraq ke Karbala-Najaf road par water treatment station se chlorine gas leak hone se 621 zaireen ko saans lene mein takleef hui aur unhein hospital le jaya gaya. Sab ko ilaaj ke baad sehatmand ghar bhej diya gaya. Waqia Arbaeen ziyarat ke doran hua jahan lakhon zaireen Imam Hussain (R.A) aur Hazrat Abbas (R.A) ke mazar par hazri dete hain.

Aaj 11 Aug 2025 ko Pakistan Open Market mein mukhtalif mumalik ki currencies ke buy rates kuch is tarah hain: U.S. Dollar 284 PKR, Euro 330.30 PKR, British Pound 380.65 PKR, UAE Dirham 77.4 PKR, Saudi Riyal 75.6 PKR, Kuwaiti Dinar 918.45 PKR, Canadian Dollar 205.1 PKR, Australian Dollar 184.1 PKR, Malaysian Ringgit 66.55 PKR, Swiss Franc 348.5 PKR, Indian Rupee 3.13 PKR.

Karachi mein 2025 mein ab tak traffic accidents mein 536 log halak ho chuke hein, jin mein 60 trucks se related, 20 dumpers se, 44 water tankers, 6 oil tankers, 25 buses, 11 mini buses aur 58 cars ke accidents shamil. Rashid Minhas Road par dumper ne bhai-behan ko kuchal diya, gusse mein logon ne 7 dumpers jala diye.

Mastung ke Spezand Railway Station ke qareeb Peshawar-bound Jaffar Express par IED blast se 5 coaches patri se utar gaye, 4 musafir zakhmi. Rescue aur relief train site par pohanch gayi, security forces ne ilaqa gher liya. November 2024 ke hamle mein 25 halak hue the, jabke pichle hafte Sibi ke paas bhi dhamaka hua.