Shangla Ke 5 Mazdoor Coal Mine Hadson Mein Halak
Shangla ke coal miners par qayamat toot gayi, sirf 6 dinon mein Balochistan ke coal mines mein 3 alag hadson ne 5 ki jaan le li aur 3 ko zakhmi kar diya. Duki mein baap or beta gas dhamake mein halak hogaye, Orakzai mein 3 aur halak hua. 50 saal se Shangla ke log jaan daav par laga kar kaam kar rahe hain.
Suleman Shehbaz Bounced Cheque Case Mein Bari Ho Gaye
LHC ki Chief Justice Aalia Neelum ne Suleman Shehbaz ke khilaf bounced cheque par FIR darj karne ka district court ka hukam cancel kar diya. Suleman ne kaha cheque chura liya gaya tha, laptops kabhi deliver nahi hua. Court ne kaha ke saboot mukammal nahi tha, tareekh aur receipts bhi missing thein. Faisla Suleman ke haq mein aya.
Nida Saleh Malik Bani Pakistan Ki Pehli Female Train Driver
Pakistan ki pehli khatoon train driver Nida Saleh Malik ne Orange Line Metro Lahore chala kar tareekh bana di. Bachpan ka khawab poora karte hue, Nida ne transportation engineering mein taleem hasil ki aur Lahore Metro se career shuru kiya. Mehnat aur merit se chuni gayi, Nida roz hazaaron musafiron ko khidmat faraham kar rahi hain.
Petrol 1 August Se Ho Sakta Hai 9 Rupay Sasta!
1 August se Pakistan mein petrol ki qeemat mein lagbhag Rs9.70 tak kami ka imkaan hai, kyunke duniya bhar mein tel sasta ho gaya hai. Ab ex-refinery price Rs168.73 se kam ho kar Rs159.66 ho gayi hai. Diesel bhi Rs3.73 sasta hua hai. Final faisla Ministry of Finance 31 July ko karegi.
Shadi Se Inkaar Par Qatal, Na Islam Mein, Na Qanoon Mein
Islam aurat ko rishte ya shadi se inkaar ka haq deta hai. Scholars ne kaha, zabardasti, qatal, aur honour killing Islam mein haram hain. Sana Yousaf aur Sidra Bibi ke waqiat ne is zulm ko be-nakaab kia. Ulema, psychologists aur activists ne demand kiya ke riyasat qanoon nafiz kare aur larkon ko emotional training dein.
Pakistan Ka Pehla Auto Safety Law Manzoor Ho Gaya
Ab unsafe ya ghair meyari gaari banane, import karne ya bechne par 3 saal tak jail aur Rs1 crore tak jurmana ho sakta hai. Naye qanoon ke tehat safety standards laazmi honge. Certificate ke baghair koi vehicle sale nahi hogi. EVs, local aur imported vehicles sab is qanoon ke daayre mein aayenge.
Shehbaz Sharif Ka Mehngi Cheeni Par Sakht Action Jari
PM Shehbaz Sharif ne cheeni ke rate aur supply ko control karne ke liye sakht hukam diya hai. Ex-mill rate Rs165 aur retail rate Rs173 per kg mukarrar kiya gaya hai. Kisi ne ziada rate liya ya supply roki to karwai hogi. Cheeni Rs190/kg tak bik rahi hai. Hoarding aur black marketing ke khilaf sakht action jari hai.
Pakistan Ka Naya Satellite Launch, Space Mein Naya Qadam
Pakistan ne China ke sath milkar naya remote sensing satellite launch kiya hai. Suparco ke mutabiq yeh satellite kheti-baari, disaster management, CPEC planning aur climate monitoring mein madad karega. Ab mulk ke 5 satellites orbit mein kaam kar rahe hain. Ahsan Iqbal ne kaha, agla goal hai 2026 mein Pakistani astronaut aur 2035 tak Moon mission.
Hajj 2026 Mein Private Hajj Ka Hissa Aadha Kiya Gaya
Hajj 2026 ke liye hukumat ne private companies ka hissa 50% kam kar diya, ab sirf 60,000 log private tareeqe se ja sakenge. 4 August se applications shuru. Hajj ka kharcha 11.5 se 12.5 lakh tak hoga. Poora nizaam digital hoga, aur pehle se register logon ko tarjeeh milegi. Nakam companies ko 2026 mein dobara Hajj karwana hoga.
FBR Ka Rs111 Billion Fine Solar Companies Par
FBR ne solar import companies par Rs111 billion ka fine lagaya hai. In companies ne jhooti documents aur zyada bill dikha kar Rs140 billion ka paisa bahar bheja. Ab tak 13 fake companies samne aayi hain, 327 containers zabt ho chuke hain. FBR inhein auction karega jiska target Rs1.5 billion hai. Case money laundering ka hai.