DHA Mein Firing, Senior Lawyer Khawaja Shamsul Islam Qatal, Beta Zakhmi
Jumme ko Khawaja Shamsul Islam ne tajir Muzammil Karim Paracha ke janaze mein shirkat ki. Masjid se nikalte waqt DHA Phase VI mein eik shakhs ne unpar firing ki. Wakeel moqa par halak ho gaye, beta zakhmi. Police keh rahi hai ke ye target killing ka case ho sakta hai, tehqiqaat jari hain.
Islamabad Mein Heavy Vehicles Ki Entry Mukammal Band
CTO Capt (R) Zeeshan Haider ne Islamabad mein heavy vehicles, overloaded trucks aur loader rickshaws par complete ban laga diya. Traffic rush aur accidents rokne ke liye strict action ka hukam. Har chowk par extra traffic staff lagaya gaya hai, drone surveillance bhi barha di gayi. Rule torne walon par fine, gaari impound aur legal action hoga.
KP Mein Taleemi Emergency, ILMpact Se Tabdeeli Aayegi
KP hukumat ne British Council aur UK FCDO ke saath mil kar ILMpact programme launch kiya hai, jiska maqsad 8 districts mein 80,000 taleem se mehroom bachon ko school mein enroll krwana hai. CM Gandapur ne education emergency ka elan kiya. Har bache ko desk aur chair milegi. Girls, ghareeb aur special needs bachay main focus hain.
Sidra Honour Killing Case, 7 Mulzim Remand Par, Saboot Baramad
Sidra honour killing case mein police ne Muzaffarabad team bheji shadi ki tasdeeq ke liye. 7 mulzim remand par, 2 jail mein. DVR footage decode hone lagi, experts ki madad li gayi. Laash le jane wala loader rickshaw aur qabar khodne ke auzaar mil gaye. Qatal mein istemal hua eik ahem saboot abhi tak nahi mila.
Aadmi 2 Bachon Ke Saath Samandar Mein Kood Gaya
Sea-View, Do Darya par eik aadmi ne 5 aur 6 saal ke 2 bachon ke saath samandar mein chalang laga di. Pehle eik bacha phenka, phir doosre ke saath khud kooda. Logon ne rescue ki koshish ki, lekin teeno ghaib ho gaye. Police aur Edhi ne talaash shuru ki, operation andheray ke baad roka gaya, aaj bh jumme ke din talaash ka silsila jari hy
Sindh Ki Agriculture Worker Khawateen Ka Haq, Tahaffuz Aur Insaaf Demand
SCF aur Common-wealth Foundation ki Women’s Assembly mein women agricultural workers ne low wages, labour rights ki kami aur climate change ke asraat par awaz uthai. Javed Hussain ne Sindh Women Agricultural Workers Act 2019 ko turant enforce karne ke demand ki. Nadeem Shah ne agriculture ko industry declare karne ki appeal ki taake aurton ko legal rights mil saken.
Cash Van Robbery, Rs9.7M Chori, Guards Ko Goli Lag Gayi
Karachi, Korangi mein bank ke bahar cash van se Rs9.7 million loot liye gaye. Firing mein 2 guards zakhmi hua, robbers Alto garri lekar farar hogaye. Police ne investigation shuru kar di hai. Bilal Colony mein Maroof Mart ki Rs3.3 million robbery solve, 3 mulzim giraftar, eik security guard bhi shamil tha.
Pakistan-US Energy Trade Deal Finalize, Tariff Mein Raiyat Ki Umeed
Pakistan aur US ke darmiyan energy aur trade cooperation par nayi deal finalize ho gayi. Trump ne kaha ke Pakistan ke oil reserves explore kiye jaenge. Pakistan ko US exports par 29% tariff mein kami ki umeed hai. Deal se energy, IT, crypto aur mining sectors mein nayi investment aur economic collaboration ka aaghaz hoga.
Trump Ne India Ko Dead Economy Kaha, Tariffs Announce Kiye
Trump ne India ki economy ko “dead” keh kar Russia se oil leny par criticize kiya. 1 August se India par 25% tariff aur penalty lagu hogi. Indian companies ne Russian oil lena temporarily rok diya. Rahul Gandhi ne Trump se ittefaq kiya aur BJP ko zimmedar thehraya. Medvedev ne Trump ke statements ko bekaar aur ghalat qarar diya.
7 Saal Ka Bachha Terrorism Case Mein Court Mein Pesh
Gwadar mein CTD ne 7 saal ke bache par terrorism ka case darj kiya, ilzam hai ke usne TikTok par Gulzar Dost ki speech share ki jo Fourth Schedule mein hain. Bacha court mein pesh hua. HRCP ne is qadam ko insaaf aur bachon ke huqooq ke khilaaf qarar de kar case wapas lene aur zimmedar afsaron ke khilaf action ki demand ki.