Mayun Ki Rasam Hui Viral
Rabeeca Khan ke Mayun aaj Karachi mein purjosh andaaz mein manai gai. Bright yellow traditional outfit aur floral jewellery mein Rabeeca sab ki tawajju ka markaz rahi. Kal raat dholki hui thi, jabke aaj ki Mayun ceremony ne social media par kafi surkhiyan bator li. Tasaveer aur clips viral hain, fans aur celebrities dono taraf se mubarakbaad mil rahi hai.
Artist Ko Nishana Banana Band Karo – Hania Aamir
Adakara Hania Aamir ne concert ke doran Talha Anjum par bottle phenkne ke waqia par shadeed rad-e-amal diya. Instagram par Hania ne likha ke artist par cheezen phenknay ka amal ghair-insani hai. Aise mahaul mein koi funkaar perform nahi kar sakta. Unhon ne kaha ke artist ko izzat aur tahaffuz dena hamara farz hai, na ke usay nishana banana.
Duniya Ka Sabse Bara Parinda Jo Urr Nahi Sakta
Ostrich duniya ka sabse bara parinda hai, lekin yeh urh nahi sakta. Is ke bawajood, yeh 70 km/h ki raftar se daurr sakta hai, yani aik car jitni tezi se! Aik ostrich ki aankh uske dimaag se bhi badi hoti hai, jo iski behtareen nazar ka raaz hai.
Balochistan Mein Naseer Mengal ke Khandan Par Qatalana Hamla
Khuzdar mein naamaloom afraad ke hamlay mein former Chief Minister Naseer Mengal ke khandan ko nishana banaya gaya, jismein unke betay Atta-ur-Rehman Mengal halak aur pota zakhmi. 30 se zyada musallah afraad ne unko nishana banaya. Zakhmi bachay ka ilaaj Khuzdar Civil Hospital mein jaari.
Joe Goldberg Masoom Chehra, Khatarnak Zehn
“You” ek dilchasp Netflix series hai. Joe Goldberg aik aisa shaks hai jo pyaar mein deewangi ki had tak chala jata hai, chaahe kisi ki jaan leni ho. Pehli nazar mein woh aik shareef aur seedha insaan lagta hai, lekin andar se ek obsessed killer hai. Har season mein naye sheher, naye log aur dehshat bhari kahaniyaan samne aati hain.
Swat Mein Dardnaak Waqia 9 Afraad Halak
Swat mein syahoon ki kashti ulat gayi, jiske natije mein 9 sayyah jaan ki baazi haar gaye. 4 ki laashein nikaal li gayi hain, jabke 3 laapata syahoon ki talaash jaari hai. 3 syahoon ko maqami logon ne bacha liya aur unhein hospital muntiqil kar diya gaya. Rescue operation jaari hai.
Karachi Mein Halki Barish Se Mausam Khushgawar
Karachi mai halki barish ne garmi se pareshan logon ko kuch rahat di. Nazimabad, North Nazimabad, New Karachi, Bahadurabad, Shahrah-e-Faisal, Saddar aur Malir mai halki barsaat se mausam suhana ho gaya. PMD ke mutabiq aaj mazeed halki barsaat ka imkaan hai. Hawa 16 km fi ghanta ki raftaar se chal rahi hai aur humidity 80% tak hai.
Karachi: Dakaiti ke Doran Firing, Ek Shakhs Zakhmi – Dako Farar
Sea View ke qareeb dakaiti ke doran firing mein Subash Chand zakhmi hua. Use foran zakhmi halat mein hospital le jaya gaya. Jawabi firing mein kuch dako zakhmi hue jo motorcycle chhor kar samandar ki taraf farar ho gaye. Police zakhmi dako ki talaash mein hai.
Digital Nomad Visa Kin Logon Ke Liye Hai
Digital Nomad Visa un afraad ke liye hai jo online kaam karte hain. Agar aapki income online hai, chahe aap YouTuber, TikToker, freelancer hain ya koi online business chala rahe hain, tou aap is visa ke liye eligible ho saktay hain. Bohat si countries is waqt remote kaam karne walon ko yeh visa offer kar rahi hain.
Muft Ilaj Ka Nizaam Magar Sabr Zaroori Hai
Canada ka healthcare system barabari par mabni hai jahan ameer aur ghareeb sab ko muft ilaj ki sahulat faraham ki jati hai. Yeh system duniya ke behtareen nizaamon mein shamil hai. Magar sabse bara challenge waqt par ilaj ka na milna hai—fever jaisi chhoti takleef ke liye 15–20 din aur emergency mein bhi 5–8 ghante intezar aam baat hai.