24 June Currency Rates in Pakistan – PKR Exchange Rates
Aaj 24 June 2025 ko Pakistan Open Market mein mukhtalif mumalik ki currencies ke buy rates kuch is tarah hain: U.S. Dollar 284.75 PKR, Euro 329.5 PKR, British Pound 385.25 PKR, UAE Dirham 77.55 PKR, Saudi Riyal 75.85 PKR, Kuwaiti Dinar 919.3 PKR, Canadian Dollar 205.5 PKR, Australian Dollar 183 PKR, Malaysian Ringgit 66.12 PKR, Swiss Franc 343.9 PKR, Indian Rupee 3.16 PKR.
TikToker Sana Yousaf Qatl Case: Umar Hayat Judicial Remand Par Jail Muntaqil
TikToker Sana Yousaf ke qatl case mein mulzim Umar Hayat ko 3 roz ka jismani remand mukammal hone ke baad adalat ne judicial remand par jail bhej diya. Prosecution ne mazeed remand ki darkhwast nahi di. Mulzim ke lawyers ne walidain se mulaqat na hone par aitraaz kiya.
Ayeza Aur Danish Ka Ghaib Hone Ka Plan
Ayeza Khan ne aik interview mein kaha ke woh aur Danish Taimoor future mein TV aur social media se door ho kar Switzerland settle hona chahte hain. Is baat ne fans ko heran kar diya. Social media par kisi ne udaasi dikhai toh kisi ne mazaak mein kaha ke abhi chalay jao.
Senate Mein Mukhalfat – Trump Nobel Prize
Kamran Murtaza ne Senate mein qarardad pesh ki, jisme Donald Trump ko Nobel P.Prize ke liye nominate karne ke hukoomati faislay ki mukhalfat ki gayi. Unka kehna tha ke Trump ne Iran par hamla kar ke international qawaneen ki khilaf warzi ki aur region mein bechaini phailayi. Unhon ne kaha nominate karne se pehle Parliament se kisi qisam ka mashwara tak nahi liya.
PIA Ne Gulf Mumalik Ki Flights Arzi Tor Par Suspend Kar Di
PIA ne Gulf mumalik ke liye apni tamam flights temporary tor par suspend kar di hain. Yeh faisla Iran ke taraf se Qatar mein US base par jawabii hamla ke baad kiya gaya hai. Spokesperson ke mutabiq, flights tab tak band rahengi jab tak surat-e-haal normal nahi ho jaati. Suspend honay walay mulkon mein Qatar, Bahrain, Kuwait aur Dubai shamil hain.
UAE ka Airspace Close, Flights Alternate Routes Par Divert.
Qatar mein U.S. military bases par huay hamlon ke baad, UAE ne ehtiyati tor par apna airspace band kar diya hai. Ab airspace dheere dheere clear ho raha hai our kai commercial flights alternate routes par divert ki ja rahi hain. Flight Radar par bhi flights ke direction change karne ka manzar dekha gaya.
Sardaar Ji 3 ka Trailer Released – Hania Aamir ki Entry Par Hungama
Diljit Dosanjh ne apni aanay wali film Sardaar Ji 3 ka trailer officially launch kar diya hai, jisme Pakistani actress Hania Aamir bhi aham kirdar ada kar rahi hain. Film 27 June ko release hogi. Hania ki casting par Indian film industry, khas tor par FWICE, ne sakht tanqeed ki hai, magar film ke liye logon ka craze barhta ja raha hai.
TikTok Star Ya Drug Supplier? Bebo Baloch Defence Se Giraftar
Karachi ke ilaqay Defence se influencer aur former model Babra alias Bebo Baloch ko crystal meth (ice) aur cocaine supply karne ke ilzaam mein giraftar kiya gaya. TikToker Babra social media ke zariye DHA aur elite ilaqon ke nojawano ko nasha faraham karti thi. Woh pehle bhi chori ke do muqadmaat mein giraftar ho chuki hai.
Karachi Mein Tez Raftaar Tanker Se Motorbike Sawar Halak
Karachi ke Korangi area mein Vita Chowrangi par aik tez raftaar water tanker ne motorbike ko kuchal diya. Hadsa itna shadeed tha ke motorbike sawar ne mouqa par hi dam tor diya. Rescue team mouqa par pohanchi aur laash ko hospital muntakil kiya. Tanker driver ki gafilana driving hadse ka sabab bani.
Panic Room – Survival Ki Khamosh Jung
Panic Room (2002) Ke ek suspense thriller film hai jisme ek maa-beti naye ghar mein shift hoti hain. Pehli raat hi kuch chor ghus jaate hain, jinka nishana ek secret vault hota hai jo panic room ke andar chhupa hai. Maa-beti usi kamre mein chhup jaati hain, aur phir shuru hota hai survival ka dimaag aur himmat se bharpur khel.