Sehatmand Drink | Farq Khud Mehsoos Karein
Ek mashhoor fitness guru ne haal hi mein cold drink ka sehatmand alternate bataya hai. Unke mutabiq 100 gram sauf, 10 gram kali mirch aur 40 gram misri ko pees kar powder bana lo. Roz ek glass pani mein ek chamach yeh powder, ek lemon aur thora sa kala namak milao. Unka kehna hai ke aapko apne body mein khud farq mehsoos hoga.
Hyderabad Mein 2 Bachay Jaan Bahaq, 20 Zakhmi
Tando Jam ke ilaqay Muzaffar Colony mein ek madrisay ki chhat girne se 2 talib-e-ilm jaan se gaye aur 20 zakhmi ho gaye. Yeh hadsa barish ke baad chhat girne se hua. Rescue team ne talib-e-ilm ko malbay se nikal kar hospital muntqil kiya. Chand zakhmi bachoo ki halat intahai tashweeshnaak hai.
State Bank Ne 1 July Ko Chhutti Ka Elan Kardia
State Bank of Pakistan ne 1 July ko holiday ka elan kiya hai. Notification ke mutabiq Mangal ke din tamaam commercial banks, State Bank aur us ke sub-offices band rahenge. Public dealing kisi bank mein nahi hogi, lekin staff duty par mojood hoga. Peer 30 June ko, jo maali saal ka aakhri din hai, banks mamool ke mutabiq khulayenge.
Ghalat Lifestyle Sehat Par Bhari Par Sakta Hai
Online jobs aur offices mein der tak baith kar kaam karne ka rujhan barhta ja raha hai, lekin is lifestyle se log apni fitness ka khayal nahi rakh pate. Musalsal baithne se kamar dard, motapay aur thakan jaise masail samne aate hain. Agar rozana thoda waqt exercise ke liye na nikala gaya to ye masail aur zyada barh sakte hain.
Juice Behtar Hai Ya Phal
Mahireen ke mutabiq eik glass orange juice banane ke liye 5 se 6 oranges istemal hote hain, lekin juice nikalne se unka fiber zaya ho jata hai. Juice sirf 1.5 minute mein peeya ja sakta hai, jabke 5 se 6 oranges itne kam waqt mein khana mushkil hai. Mahireen ke mutabiq phal khana zyada mufeed aur sehatmand hai.
29 Talib-e-ilm Halak, 280 Zakhmi
Central Africa ke ek school mein imtihaan ke doran transformer ke dhamake se afra tafri machi. Dhuwan aur shore se 6,000 students ghabra kar bhaagne lage. Chhota darwaza hone ki wajah se bhagdar machi, 29 bachay halak aur 280 zakhmi ho gaye. Central Africa ke Saddar ne mulk bhar mein qaumi soog ka elan kar diya.
Students ke Liye Qiston Par Bikes ka Aaghaz
Maryam Nawaz ne E-Bike Scheme 2025 ka aaghaz kar diya hai. 27,000 bikes (10,000 electric, 17,000 petrol) students ko interest free qiston par milengi. Electric bike ki qist Rs 5,000 se 7,000 aur petrol bike ki Rs 3,000 se 5,000 hogi. Aaghaz 1 July se hoga, aakhri tareekh 20 July hai. E-bikes mein GPS, solar charging, helmet aur Lahore-Faisalabad mein larkiyon ke liye free repair workshops bhi shamil hain.
Landhi Mein Gaari Ka Haadsaa, Aik Shakhs Halak
Landhi Sherpao Colony mein mini truck driver ne control khoya aur hotel se takra gaya. Haadsay mein hotel par baitha hua Sheikh Nazir jaan bahaq, jabke Iqbal zakhmi hua. Dono ko hospital muntaqil kar diya gaya. Police ne driver ko giraftar kar liya, truck qabze mein le kar mukadma darj kar diya gaya hai.
Swat Mein 18 Afraad Dariya Mein Beh Gaye
Swat mein sair ke liye aaye Sialkot ke 18 afraad ka khandan dariya ke kinare nashta kar raha tha ke pani ka bahaao achanak taiz ho gaya aur sab iski lapait mein aa gaye. Rescue 1122 ke mutabiq 3 afraad zinda nikale gaye, 1 aurat samet 5 laashen mil chuki hain, jabke 9 bachay ab tak laapata hain.
Iran Ne U.S. Se Guftagu Se Inkaar Kar Diya
Iran ne U.S. se baat cheet ka imkaan mustarad kar diya hai. Foreign Minister Abbas Araqchi ne kaha ke abhi kisi mulaqat ka plan nahi. Pehle ke paanch round Israel aur America ke Iran ke nuclear facilities par hamlon ke baad rukh gaye. Iran ka kehna hai uska nuclear program sirf civil maqasid ke liye hai.