Monsoon Aur Ihtiyati Tadabeer
Jaise hee monsoon ka season shuru hota hai, mulk bhar mein dengue, malaria, skin problems aur doosray mutaddi amraz sar uthane lagte hain. Humein chahiye ke monsoon ke dino mein safai ka khaas khayaal rakhein. Pani ko kahin bhi jama na honay dein, machhar mar spray ka istemal karein aur apne ghar aur aas paas ke ilaqay ko saaf rakhein.
Sadiq Abad Se 13 Mazdoor Aghwa Ho Gaye
Sadiq Abad mein aam ke baagh se 13 mazdoor, jin mein do bachay bhi shamil hain, dakoo’n ne aghwa kar liya aur unhein katcha area le gaye. Waqe ke baad do mukhtalif ilaqon ke police stations ke darmiyan ikhtiyarat ka tanaza hua, jis ke sabab case der se darj hua. Ab mukadma Sonmiani police station mein darj hai. Talaash jaari hai.
Lahore Zalzale Ki Lapait Mein
Lahore aur qareebi ilaqon mein shadeed zalzale ke jhatkay mehsoos kiye gaye. Kasur, Muridke, Sheikhupura, Gujranwala, Kamunke aur Nankana mein bhi imaratien laraz gayin. Zalzale ki shiddat 4.4 record hui, is ki gehraai 14 km aur markaz Lahore se 25 km janub maghrib mein tha. Log Kalma Tayyaba parhtay hue gharon se bahar nikal aaye. Abhi tak koi nuksan report nahi hua.
Water Tanker ki Takkar Se Motorcycle Sawar Halak
Site Area aur Liaquat Chowrangi ke qareeb water tanker se takra kar eik motorcycle sawar halak ho gaya. Law enforcement agencies ne fori karwai karte hue tanker ko qabzay mein le liya. Iske baad police ne mudakhlat karte hue maamlay ki mukammal tahqiqat ko yaqini banaya. Baad mein tanker aur uska driver Site-A thana muntqil kar diya gaya.
Lord Miles ke Chori Shuda AirPods Jhelum Se Baramad
British vlogger Lord Miles ke Dubai se chori hue AirPods Punjab Police ne trace karke wapas dilwa diye. Ek Indian shakhs ne chori karke yeh overseas Pakistani ko bech diye, jo Jhelum le aaya. Miles ek saal se apne AirPods track kar rahe thay. Tracking info par Punjab Police ne action liya aur akhirkar AirPods Lord Miles ko wapas mil gaye.
Afwahon Ka Khatma Paresh Rawal Confirmed!
Paresh Rawal ne tasdeeq ki ke woh Hera Pheri 3 mein wapas aa rahe hain, jisse kaafi arsay se chal rahi afwahon ka khatma hua. Pehle kuch ikhtilafat aur legal notice ki khabrein aayi thin, lekin ab sab wazahat ho chuki hai. Kaafi rukaawaton ke baad, project ne akhirkar raftaar pakar hee li.
Dr. Aafia Siddiqui Case: Hukumat ka Inkar
Hukumat ne Amreeki adalat mein Dr. Aafia Siddiqui case mein qanooni madad aur fariq ban’ne se inkar kar diya hai. Islamabad High Court mein samat ke doran Justice Sardar Ijaz ne wajah poochi, lekin Additional Attorney General ne wazahat kiye baghair sirf yeh bataya ke yeh hukumat ka faisla hai. Adalat ne 4 July tak tafseelat pesh karne ka hukm de diya.
Dosti Kyun Khatam Ki? TikToker Ki Janib Se Firing Ka Waqia
Lahore ke ilaqay Hair mein do doston ke darmiyan dosti tootne par TikTokers ne had se guzar kar apni sabiq dost ke ghar par firing karwa di. Police ne TikToker Suzanne, Nimra aur unke saathi Ahmed ke khilaf FIR darj karli hai. Firing mein koi jani nuksan nahi hua, aur mulziman ki giraftari ke liye koshish jaari hai.
Sindh Mein Is Saal Dengue Se Pehli Maut
Sindh mein is saal dengue se pehli maut samne aayi hai. 24 saal ka mariz 2 din tak ventilator par raha magar zindagi ki baazi haar gaya. Uske platelets 32,000 tak gir chuke thay. Hospital intazamiyah ke mutabiq sehatmand shakhs ke platelets 150,000 se 450,000 tak hotay hain. Is saal Sehat Department ke mutabiq Sindh mein 295 dengue cases report huay, jin mein 260 Karachi se hain.
Sialkot Mein Bachon Ke Jhagre Mein Do Qatal
Sialkot: Gangal gaon ke qareeb eik choti si bachon ki laraai baray tanaza mein badal gayi. Dono fareeqeen mein firing ka tabadla hua, jismein 25 saala Zaheer aur 40 saala Shoaib halak ho gaye. Waqia Sabzpir Police Station ki hadood mein hua. Police ne moqa-e-wardaat par pohanch kar tahqiqat shuru kar di hain.