21 Saal Ka Nojawan Baap Ke Haath Qatal
Karachi ke Orangi Town mein walid ne apne 21 saal ke beta ko Khawaja Sara se dosti rakhne par qatal kar diya. Police ne Abdul Ghaffar ko giraftar kiya. Mulzim ka kehna hai ke beta Khawaja Saraon se aksar milta tha aur mana karne ke bawajood baaz nahi aaya. Pehle beta ko bijli ke jhatke diye gaye, phir usay qatal kiya gaya.
Punjab Mein Monsoon Alert, Barish Ka Imkaan
PDMA ne Punjab bhar mein 5 July se shuru hone wale taqatwar monsoon spell ke liye high alert jaari kar diya hai. Khaas tor par Youm-e-Ashura ke moqe par shadeed barishon ka imkaan hai. Rain emergency plan tayar hai, drainage system activate kar diye gaye hain aur monitoring desks qaim ki gayi hain.
Motorcycle Sawar Dono Afraad Ke Liye Helmet Lazim
Islamabad Traffic Police ne motorcycle par sawar dono afraad ke liye helmet pehnna lazmi karne ka faisla kiya hai. CTO Zeeshan Haider ke mutabiq, mard aur khawateen dono ko helmet pehnna hoga. 2 hafton ki awareness campaign ke baad challan ka silsila shuru hoga. Helmet ka istemal hadsa ki surat mein zindagi bachane mein madadgar sabit hota hai.
Railway Kirayoon Mein 2 Percent Izafa
Petrol aur diesel ke qeemat mein izafa hone ke baad Pakistan Railways ne bhi kirayoon mein 2% izafa kar diya hai. Ye izafa 4 July se nafiz hoga aur tamam passenger, shuttle aur saloon gaariyon par laagu hoga. Pehlay se karwai bookings par bhi ye izafa hoga. Railway officials ke mutabiq, diesel mehnga hone se 109 million ka nuqsan ho raha tha.
Bijli Sasti Karne Ka Faisla – Awam Ko Raahat
Nepra ne 100 se 500 unit mahana bijli istemal karne walon ke liye 1.15 rupay fi unit bunyadi tariff mein kami ki hai. Yeh kami hukoomati notification ke baad poore mulk mein nafiz ki jaye gi. Faislay ka maqsad bijli ke bills mein raahat dena aur awam ka maali bojh kam karna hai.
Bomb Dhamakay Mein 4 Afraad Shaheed
Khyber Pakhtunkhwa ke zila Bajaur mein Siddiqabad Phatak Mela Ground ke qareeb bomb dhamaka hua. Dhamakay mein Deputy Commissioner aur 2 police ahlkaron samait 4 afraad shaheed ho gaye. 11 log zakhmi hue jinhein Rescue 1122 ki team ne bar waqt pohanch kar tibbi imdad faraham ki aur unhein District Hospital Khar muntaqil kiya.
Maryam Nawaz: Apni Chhat, Apna Ghar
Punjab Chief Minister Maryam Nawaz ki qiyadat mein “Apni Chhat, Apna Ghar” project ke taht chand mahino mein 50 hazar se zyad ghar tameer hue aur 57.9 arab rupay ke qarzay mustahiq afraad ko mile. Punjab hukumat ke mutabiq yeh mansoba sirf makaan ki farahmi nahi, balkay rozgar, maqami ma’eeshat aur construction sector ke farogh ka sabab bhi ban raha hai.
Hukumat Ka 5 Lakh Ton Cheeni Import Ka Faisla
Aala satah ijlaas mein hukumat ne 5 lakh ton cheeni import karne ka faisla kiya hai. Cheeni ki import hukumat khud karegi aur qeemat mein kisi qisam ka izafa bardasht nahi kiya jayega. Zakhira andozi aur mehngi cheeni bechnay walon ke khilaf sakht karwai ki jayegi taake qeemat ko qaboo mein rakha ja sake.
Asia Cup 2025 Ka Mumkin Schedule Samne Aa Gaya
Asia Cup 2025 ka aaghaz 4 ya 5 September se honay ka imkaan hai, final faisla is hafta expected hai. India mehzban hai, lekin event hybrid model ke tehat hoga. T20 format ka ye cup UAE me hoga. Pak-India ka muqabla 7 September ko Dubai me hoga. Pehle UAE aur Sri Lanka ko mehzbani ke liye dekha gaya, magar halat ke tanazur me UAE chuna gaya.
Shaadi Se Pehle Thalassemia Ka Test Ek Zaroori Qadam
Thalassemia Eik takleef deh bemari hai. Ye khoon ke us marz ko kehte hain jis mein achha aur meyari khoon nakaafi miqdaar mein banta hai. Maa baap mein genes ki khamiyon ki wajah se ye bemari aulaad mein muntaqil hoti hai. Bacha zindagi bhar intaqal-e-khoon ke liye haspatalon ke chakkar lagata hai. Is liye shaadi se pehle test zaroor karwaya jaye.