TikTok Na Delete Karne Par Beti Qatl
Rawalpindi mein eik walid ne apni 16 saal ki beti ko goli maar kar qatl kar diya kyun ke us ne mobile se TikTok account delete karne se inkaar kar diya. Waqia Rawat police station ke ilaqay mein hua. Ghar walon ne qatl ko khudkushi ka rang dene ki koshish ki, lekin tafteesh se maaloom hua ke larki ko qatl kiya gaya tha.
Lifetime Golden Visa Se Mutaliq Ghalat Daaway
United Arab Emirates nai wazeh taur par kaha hai ke kuch khaas mulkon ke logon ko lifetime Golden Visa dene ki koi policy nahi hai. ICP ke mutabiq sirf hukoomi zarye se hi visa apply kiya ja sakta hai. Jhootay daaway karnay walay consultants ya websites ke khilaf qanooni karwai ki jaayegi, awam ko hoshiyar rehna chahiye.
Humaira Asghar ki Laash Lene se Khandan Ka Inkar
Karachi mein inteqal karne wali actress Humaira Asghar ki laash lene se unke walid ne inkar kar diya hai. SSP South Mahzoor Ali ke mutabiq, police ne Humaira ke walid aur bhai se rabta kiya magar walid ne kaha ke wo 2 saal se us se talluq tor chuke hain. Wafat ki wajah ka taayun postmortem aur chemical examination report ke baad hoga.
11 July Ko Public Holiday Ka Elan
11 July ko Baba Haji Sher Diwan ke Urs ki waja se public holiday ka elan kiya gaya hai. Vehari Deputy Commissioner Imrana Tauqeer ke mutabiq, is din tamam sarkari daftar band rahenge. Magar taleemi board aur universities ke imtihaan mutasir nahi honge. Health, security, municipal aur emergency services ka kaam mamool ke mutabiq jaari rahega.
9 July Currency Rates In Pakistan PKR Exchange Rates
Aaj 9 July 2025 ko Pakistan Open Market mein mukhtalif mumalik ki currencies ke buy rates kuch is tarah hain: U.S. Dollar 285.7 PKR, Euro 335 PKR, British Pound 389 PKR, UAE Dirham 77.8 PKR, Saudi Riyal 76.15 PKR, Kuwaiti Dinar 922.30 PKR, Canadian Dollar 208 PKR, Australian Dollar 185.5 PKR, Malaysian Ringgit 66.46 PKR, Swiss Franc 353.63 PKR, Indian Rupee 3.23 PKR.
Zafar Abbas ki Vigo Arab Raza Chala Raha Tha
Karachi ke Ancholi ilaqay mein Vigo aur motorcycle ke darmiyan tasadum hua, jismein 19 saala Muhammad Ibrahim aur 17 saala Abdul Ahad shadeed zakhmi ho gaye, jo Agha Khan Hospital mein ilaj kay liye dakhil hain. Vigo JDC ke General Secretary Zafar Abbas ke naam register hai, jise Arab Raza chala raha tha, police ne dono gaariyan qabzay mein le li hain.
Muzaffargarh Mein 180 Bhaison ki Anokhi Dakaeti
Muzaffargarh ki tehsil Alipur ke ilaqay Langrawah mein eik anokhi dakaeti hui jahan 30 musallah dakoo 180 bhaisain chura kar farar ho gaye. Police ka kehna hai ke dakoon ka talluq Bosan aur deegar jaraiem pesha gangs se hai, un ki talaash ke liye Muzaffargarh aur Rajanpur ke kachay ilaqay mein nakabandi karwa di gayi hai.
Chaar Bachiyon Ki Laashein Taalab Se Mili
Larkana, Sahib Khan Melano mein eik dardnaak waqia hua, jahan eik hi khandan ki chaar chhoti bachiyan kal se laapata thi aur aaj unki laashein eik taalab se mili. Bachiyan kheton mein walidain se milne gayi thi. Maqtoolon mein Bushra 5 saal, Fatima 6 saal, Humaira 7 saal aur Amna 8 saal, ki thi ilaqay mein soog ka mahol hai.
Zalzale Ke Jhatkay Mehsoos Kiye Gaye
Muzaffarabad mein 3.5 shiddat ka zalzala mehsoos kiya gaya, jiska markaz Muzaffarabad se 10 kilometer shumal mashriq mein aur gehrai 18 kilometer record ki gayi. Log ghabra kar gharon se bahar nikal aaye. Haal hi mein Pakistan mein zalzalon mein izafa dekha gaya hai, jo awam ke liye tashweesh ka sabab ban raha hai.
Bangladesh Tour Se Pehle Haris Rauf Zakhmi
Bangladesh tour se pehle Pakistan cricket team ko bara nuqsan hua hai, kyunke fast bowler Haris Rauf hamstring injury ka shikar ho gaye hain. Yeh choot unhein America mein Major League Cricket k doran lagi, jahan wo San Francisco Unicorns ki taraf se khel rahe thay. Unki jagah Ben Lister ko team mein shamil kar liya gaya hai.