Dera Ismael Khan Mein 5 Afraad Jaan Bahaq
Dera Ismael Khan mein subah ke waqt Karri Khaisoor-Chashma Road par eik truck aur car ke darmiyan shadeed tasadum hua, jis ke natije mein eik aurat samait paanch afraad jaan bahaq ho gaye. Tamaam afraad car mein safar kar rahe thay aur Dera Ismael Khan ke rehne walay thay. Rescue 1122 ne laashein DHQ hospital muntakil kar dein.
Karachi Mein Eik Aur Nojawan Ka Qatal
Karachi ke Orangi Town mein 24 saala Jibran ko daketi ke dauran goli maar kar qatal kar diya gaya. Jibran kuch arsa pehle Saudi Arabia se walid ke inteqal ke baad wapas aaya tha. Woh ghar ke bahar betha tha ke dakoon ne mobile aur purse cheen kar goli chala di. Mulzim ki talaash jaari hai.
Balochistan, Kharan Mein Zalzale Ke Jhatkay
Balochistan, Kharan mein zalzale ke jhatkay mehsoos kiye gaye. Seismological Center ke mutabiq zalzale ki shiddat 3.8 record ki gayi, jabke gehraai 30 kilometer thi. Zalzale ka markaz Kharan se 34 kilometer southeast mein tha. Jhatkon ke baad log dar aur ghabrahat ka shikar ho gaye, lekin kisi nuqsan ki report nahi mili.
10 July Currency Rates in Pakistan PKR Exchange Rates
Aaj 10 July 2025 ko Pakistan Open Market mein mukhtalif mumalik ki currencies ke buy rates kuch is tarah hain: U.S. Dollar 286.5 PKR, Euro 336.25 PKR, British Pound 390 PKR, UAE Dirham 78.10 PKR, Saudi Riyal 76.45 PKR, Kuwaiti Dinar 926.45 PKR, Canadian Dollar 209 PKR, Australian Dollar 186 PKR, Malaysian Ringgit 66.46 PKR, Swiss Franc 353.63 PKR, Indian Rupee 3.23 PKR.
Zehreela Khana Khanay Se 2 Bachiyan Jaan Bahaq
Rahim Yar Khan mein afsosnaak waqia hua jahan zehreela khana khanay se 2 choti bachiyan jaan bahaq ho gai, jabke teesra bacha abhi bhi intahai nazuk haalat mein hai. Walidain ke mutabiq khana ghar ka bana tha. Sheikh Zayed Hospital mein pohanchne ke baad un mein se doo ki maut ho gayi. food sample laboratory bhej diya gaya hai.
Bijli Ki Qeemat Mein Kami Discos 49p, K-Electric 4.60p
NEPRA ne bijli ki qeemat kam karne ki notification jari kar di hai. DISCOs ke consumers ke liye 49 paise per unit aur K-Electric ke liye 4 rupay 60 paise per unit ki kami ki gayi hai. Yeh faisla fuel adjustment ki buniyad par kiya gaya hai, lekin yeh Lifeline, prepaid users aur EV charging stations par laagu nahi hoga.
Job Ke Sath Business Karna Hai Behtareen Tareeqa
Kabhi bhi job chhor kar foran business shuru na karein. Ager aap job kar rahe hain aur business ka irada hai, tou apne 24 ghanton mein se sirf 4–5 ghante part-time business ko dein. Aista aista seekhein, samjhein aur grow karein. Business mein sabr zaroori hai. Taraqqi dheere dheere milti hai, jaldbazi nuksan ka sabab ban sakti hai.
Woh Jo Pills Khati Ho Woh kya Hain, 105m Views
Alina Amir ki lip sync video “Woh jo pills khati ho woh kya hain?” ne Instagram par dhamaka macha diya hai. Is video ko ab tak 105 million views, 6.4 million likes aur 1.3 million shares mil chuke hain. Alina ne Insta Story mein kaha, “Thank you for the love.” Fans is trend par reaction aur funny videos bhi bana rahe hain.
Alice In Borderland Season 3 Ka Intezaar Khatam
Netflix ki mashhoor Japanese series Alice in Borderland ka Season 3, 25 September 2025 ko duniya bhar mein release hogi. Pehlay do seasons duniya bhar mein bohot popular huay. Ab yeh series ek baar phir intense story, suspense aur action se bharpoor manzar dikhane aa rahi hai. Iske teaser ko YouTube par 2.7 million dafa dekha ja chuka hai.
Dollars Ki Barsaat, Overseas Bhaiyon Ka Naya Record
State Bank ke mutabiq overseas Pakistanion ne eik saal mein $38.3 billion Pakistan bheje. Sirf June 2025 mein $3.4 billion aaye. Sab se zyada paisay Saudi Arabia se $823.2 million, uske baad UAE se $717.2 million, UK se $537.6 million aur US se $281.2 million bheje gaye. Hamare bahr mulk rehne wale bhai watan ko mazboot banane mein apna kirdar ada kar rahe hain.