11 July Currency Rates in Pakistan PKR Exchange Rates
Aaj 11 July 2025 ko Pakistan Open Market mein mukhtalif mumalik ki currencies ke buy rates kuch is tarah hain: U.S. Dollar 286.5 PKR, Euro 336.25 PKR, British Pound 390 PKR, UAE Dirham 78.10 PKR, Saudi Riyal 76.45 PKR, Kuwaiti Dinar 926.45 PKR, Canadian Dollar 209 PKR, Australian Dollar 186 PKR, Malaysian Ringgit 66.46 PKR, Swiss Franc 353.63 PKR, Indian Rupee 3.23 PKR.
Adakara Humaira Asghar Ka Janaza Governor House Mein
Governor Sindh Kamran Khan Tessori ne actress Humaira Asghar ki dafan aur janaze ke tamam kharch apne zimay le liye hain. Unho ne kaha ke agar khandan shaamil nahi hota to wo khud sara intezam karenge. Janaza Governor House mein ada kiya jayega, jahan tayyariyon ka hukam bhi de diya gaya hai.
Pakistan Mein Netflix Ki Hit Films, 10 July
Netflix par dhamakedar films ne sab ka dhyan kheench liya hai. Aaj ke top 10 trending titles mein Raid 2, The Old Guard 2, Thug Life, KPop Demon Hunters, The Old Guard, Infinite, Jaat, Sikandar, HIT The Third Case, aur Jewel Thief The Heist Begins shaamil hain. Ye movies zabardast action aur kahani ki wajah se pasand ki ja rahi hain.
YouTube Ki Nai Monetization Policy, 15July
YouTube ne 15 July se apni monetization policy mein aham tabdeeli ka elan kiya hai, jiska maqsad asli aur creative videos ko promote karna hai. Naqli, low quality, AI se banayi gayi aur bar bar dohrayi janay wali videos ko discourage kiya jayega. Nayi policy ke mutabiq maloom hoga ke kis qisam kai content se paisa kamaya ja sakta hai aur kis se nahi.
Chandi Ki Qeemat Mein Zabardast Izafa
Pakistan mein chandi ki qeemat mein bhi khaasa izafa dekha gaya hai. 24 karat chandi ka eik tola ab 3851 rupay ka ho gaya hai jabke 10 gram ki keemat 3301 rupay tak pohanch gayi hai. Agar aap har mahene eik tola chandi khareed lein tou aanay walay waqt mein yeh eik zabardast investment sabit ho sakti hai.
Pakistan Mein Gold Ki Qeemat Mein Izafa
Thursday ko Pakistan aur duniya bhar mein gold kai daam mein zabardast izafa dekha gaya. 24 karat gold ka eik tola 3200 rupay se barh kar 354700 rupay ka ho gaya. 10 gram gold ki keemat 2515 rupay se barh kar 278766 rupay tak pohanch gai. Duniya bhar mein bhi gold ki keemat 32 dollar se barh kar 3324 dollar ho gayi.
Dubai Ka Visa Pakistaniyon Ke Liye Naamumkin?
Raza Samo ne hal hi mein eik video mein bataya ke Dubai ka visa Pakistanion ke liye mushkil hota ja raha hai, kyunke kai desi log wahan ke qanoon follow nahi kar rahe. Khufiya tor par larkiyon ki videos banana, bheek mangna aur chori jaisa crimes aam ho gaye hain. Saudia mein bhi 2022 mein 5000 Pakistanion ko deport kiya gaya hai.
Call Centre Par Chapa 149 Afraad Giraftar
Police ne Faisalabad mein eik call centre par chapa maar kar 149 afraad ko giraftar kar liya, jismein 71 ghair mulki, zyadatar Cheeni shehri shamil tha. NCCIA ke mutabiq yeh call centre Ponzi schemes aur investment fraud mein mulawis tha. Yeh log awaam ko dhoka de kar bohat ziada raqam najaiz tareeqon se ikatthi kar rahe thay.
55 Saal Ki Umar Mein Matric Pass Kiya
55 saala Faizul Haq ne sabit kar diya ke taleem hasil karne ke liye umar nahi lagan zaroori hoti hai. Woh ek sarkari school mein chaprasi ki duty ada karte hain. Unhon ne 600 number le kar second division mein matric pass kiya. School ke ustadon ki hosla afzai se unka taleemi khwab poora hua.
Dera Ismael Khan Mein 5 Afraad Jaan Bahaq
Dera Ismael Khan mein subah ke waqt Karri Khaisoor-Chashma Road par eik truck aur car ke darmiyan shadeed tasadum hua, jis ke natije mein eik aurat samait paanch afraad jaan bahaq ho gaye. Tamaam afraad car mein safar kar rahe thay aur Dera Ismael Khan ke rehne walay thay. Rescue 1122 ne laashein DHQ hospital muntakil kar dein.