Muzaffarabad Mein Nayaab Leopard Halaak, Case Darj
Basant Kot, Tehsil Pathika mein na-maloom afraad ne eik nayaab leopard ko goli maar kar halaak kar diya. Wildlife Department ke mutabiq leopard ki umar taqreeban 5 se 6 saal thi. Intizamiya ne leopard ki laash qabzay mein le li hai aur is waqia ka muqadma bhi darj kar diya gaya hai.
Har Cheez Se Dar Lagta Tha Nausheen Shah
Nausheen Shah ne eik show mein bataya ke woh sakht depression ka shikar thi, jis ke sabab unhon ne eik saal tak showbiz se break liya. Unka kehna tha ke woh andr se khaali ho gayi thi, har cheez se dar lagta tha. Ab woh behtar hain, unhon ne mashwara diya ke aise halat mein foran doctor se rujoo karna chahiye hai.
FBR Ke Khilaf Tajiron Ka Ehtijaj
Poore mulk ke tajiron ne 19 July ko hartal ka elan kiya hai. Karachi Chamber ke rehnuma Javed Balwani ne kaha hai ke FBR ke rules 37A aur 37B tajiron ko qabool nahi, kyunke in se tajiron ko bina notice ke raid karne, account freeze karne aur record zabt karne ka ikhtiyar mil jata hai. FPCCI ne bhi is hartal ki himayat ki hai.
Police Aur Rangers Ke Darmiyan Firing Ka Waqia
Site A area mein Police aur Rangers ke darmiyan firing se eik police constable Waseem Akhtar halaak aur Rangers ka Noman zakhmi ho gaya. SSP Keamari ke mutabiq dono ke darmiyan jagra hua tha jo baad mein firing mein badal gaya. Noman 34 Wing mein tainaat hai, jabke Waseem Gulshan-e-Maymar mein duty par tha. Dono afraad se 9mm pistols baramad hui hain.
12 July Currency Rates in Pakistan PKR Exchange Rates
Aaj 12 July 2025 ko Pakistan Open Market mein mukhtalif mumalik ki currencies ke buy rates kuch is tarah hain: U.S. Dollar 287 PKR, Euro 335.5 PKR, British Pound 390 PKR, UAE Dirham 78.20 PKR, Saudi Riyal 76.50 PKR, Kuwaiti Dinar 927.65 PKR, Canadian Dollar 210 PKR, Australian Dollar 187.50 PKR, Malaysian Ringgit 66.46 PKR, Swiss Franc 353.63 PKR, Indian Rupee 3.23 PKR.
Beti Ke Paiso Ka Tana, Tennis Player Qatl
25 saala Indian tennis player Radhika Yadav ko us ke walid Deepak Yadav ne goli maar kar qatal kar diya. Ghar mein dono akelay tha. Wajah gharelu tanaza, social media par Radhika ki presence, aur logon ki tanqeed thi. Walid ne qabul kiya ke log usay beti ke paison par guzara karna ka tana detay tha. Radhika ke kirdar par bhi sawal uthate tha.
Aafia Siddiqui Case Adalat Ka Sakht Rad-e-Amal
Islamabad High Court ne federal hukoomat par sakht narazgi ka izhar kiya ke Aafia Siddiqui ke release, sehat aur wapsi se mutaliq report ab tak pesh nahi ki gayi. Justice Ejaz Ishaq Khan ne kaha agar report na di gayi tou poori federal cabinet ko talab karenge. Court ne report jama karwane ke liye agle haftay tak ki mohlat di hai.
Tesla Ka Pehla Experience Centre Mumbai Mein
Elon Musk ki company Tesla 15 July ko Mumbai mein apna pehla store kholne ja rahi hai, jise “experience centre” kaha ja raha hai. Tesla ki Model Y ki paanch gaariyaan Mumbai pohanch chuki hain, jin ki keemat ₹27.7 lakh hai aur in par ₹21 lakh se zyada import duty lagi hai. Model Y ki expected price ₹47 lakh se zyada hogi india mein.
Robot Ne Baghair Madad Ke Gallbladder Surgery Ki
Johns Hopkins University ke sciencedaanon ke AI-guided robot ne surgery ki videos par training hasil ki. Robot ne pehli dafa, baghair insani madad ke, eik zinda jism par gallbladder nikaalne ka lamba marhala mukammal kiya. Mahireen ke mutabiq, robot ne 100% sahi se kaam kiya hai, lekin insan surgeon ke muqablay mein zyada waqt liya.
Adakara Humaira Asghar Ke Bhai Ne Wazahat Di
Adakara Humaira Asghar ki wafat ke baad unke ghar walon par laaparwahi ka ilzam lagaya gaya, lekin unke bhai Naveed Asghar ne wazahat di ke woh police ke sath lagataar raabta mein thay. Unka kehna tha ke walid ne zehni dabao ki wajah se body lene se inkar kiya. Forensic reports aayengi to us ke baad apna Laiyha Amal batayenge.