Apna Haq Lenay Ke Liye Zillat Kyun?
Syed Mohammed Ahmed ne showbiz industry mai late payments ka masla uthaya. Unka kehna tha ke jab paisay ki baat aaye to production walay phone nahi uthate, aur baar baar paisay mangne, apne financial masail batane ke baad he kuch milta hai. Aakhir mai aesa mehsoos karwate hain jaise unho ne koi bara ehsan kar diya ho.
Shikarpur Mein Building Ko Aag Lag Gai
Shikarpur ke Sarafa Bazaar mein Kashif Departmental Store mein solar system ke short circuit se 3 manzila imarat mein aag lag gai. Aag se 20 million rupay se zyada ka nuqsan hua. Fire brigade foran pohanch gayi, magar band raste aur charon taraf bandishon ne rukawat daali. Abhi tak kisi ke jaanii nuqsaan ki koi ittila nahi ayei.
Abdu Chori ke Ilzam Mein Giraftar
Tajikistani singer aur Bigg Boss 16 ke participant Abdu Rozik ko Dubai airport par giriftar kiya gaya. Management company ne kaha ke unhein chori ke ilzam mein hirasat mein liya gaya hai. Abdu sirf 21 saal ke hain aur unhein Montenegro se Dubai land karte hi roka gaya. Taqreeban foran unhein custody mein le liya gaya.
Sunaar Se 3 Crore 95 Lakh ki Loot Maar
Karachi ke ilaqay Tariq Road par chaar na maloom afraad ne eik sunaar se 3 crore 95 lakh rupay loot liye. Sunaar Saddar Sarafa Bazaar se sona farokht kar ke paisay le kar wapas aa raha tha ke na maloom afraad ne aslah ke zoar par paisay chheen liye aur farar ho gaye. Tehqiqaat jaari hai aur CCTV footage hasil ki ja rahi hai.
Humaira Asghar Ke Baad Adakaraon Ka Group
Adakara Tooba Anwar ne bataya ke kuch showbiz adakaraon ne eik WhatsApp group banaya hai jiska maqsad eik dosray se raabta mein rehna aur zehni sehat ke hawale se eik dosray ka haal maloom karna hai. Yeh qadam Humaira Asghar ke wafat ke baad uthaya gaya, jo tanhaai mein zindagi guzar rahi thi aur unka koi haal poochhne wala nahi tha.
Stage Adakaron Ki Sakht Nigraani, Notice Jari
Punjab Council of the Arts ne stage adakaron ke dance performances par sakht nigraani shuru kar di hai. Stage adakara Sajjan Chaudhry ko eik na munasib dance performance par notice bheja gaya hai. Unhein kaha gaya hai ke woh 3 din ke andar jawab dein, warna unke khilaf sakht qanooni karwai ki jaayegi.
13 July Currency Rates In Pakistan PKR Exchange Rates
Aaj 13 July 2025 ko Pakistan Open Market mein mukhtalif mumalik ki currencies ke buy rates kuch is tarah hain: U.S. Dollar 287.10 PKR, Euro 335.60 PKR, British Pound 390.10 PKR, UAE Dirham 78.30 PKR, Saudi Riyal 76.60 PKR, Kuwaiti Dinar 927.65 PKR, Canadian Dollar 210.10 PKR, Australian Dollar 187.60 PKR, Malaysian Ringgit 66.30 PKR, Swiss Franc 353.73 PKR, Indian Rupee 3.23 PKR.
Sheikhupura Mein Pregnant Aurat Ka Qatal, Shohar Giraftar
Punjab ke ilaqe Mananwala mein eik pregnant aurat Iqra Bibi par shohar Zohaib ne tashadud kiya. Police ke mutabiq, aurat ko dando aur eenton se maara gaya. Aurat ko shadeed zakhmon ke saath hospital le jaya gaya, lekin woh wahan dam tor gai. Waqia ka muqadma uske walid ki darkhwast par darj kar ke Zohaib ko giraftar kar liya gaya.
Khatoon Giriftar Janwaron Par Tashadud Karne Ka Ilzaam
Lahore ke Defence ilaqay mein Khansa Hussain naam ki eik khatoon ko giriftar kiya gaya hai jo apnay ghar mein janwaron par tashadud karti thi aur unki videos social media par upload karti thi. Authorities ke mutabiq wo mentally unstable hai. Us ke ghar se kai murda aur zakhmi janwar baramad hua. Zinda janwar Wildlife Department ke hawalay kar diye gaye hain.
Gold Aur Silver: Qeematon Mein Khasa Izafa
Pakistan aur duniya bhar mein Gold ke qeematon mein khasa izafa dekha gaya. 24 karat Gold ka eik tola Rs1,100 izafa ke saath Rs358,100 ka ho gaya, 10 gram Rs307,013. Duniya bhar mein bhi Gold ki qeemat $11 se barh kar $3,356 ho gai. Chandi ke qeematon mein bhi khasa izafa dekha gaya, Eik tola Rs4,022 aur 10 gram Rs3,488 ka ho gaya.